Հայաստանը հավանություն է տվել Ռուսաստանի հետ վարկային համաձայնագրի նախագծին՝ հայկական ԱԷԿ-ի շահագործման ժամկետը երկարացնելու համար: Այս մասին կառավարության նիստում հայտնել է ֆինանսների նախարար Գագիկ Խաչատրյանը: Նա նշել է, որ վարկը կօգտագործվի 2016 – 2026թթ.՝ ԱԷԿ-ի շահագործման սահմանային ժամկետը երկարացնելու աշխատանքներին:
Ավելի վաղ ՀՀ էներգետիկայի նախարար Երվանդ Զախարյանը հայտնել էր, որ ֆինանսավորումը ներառում է 270 մլն դոլարի վարկ եւ 30 մլն դոլարի դրամաշնորհ:
Նշենք, որ մինչեւ 2026 թ. ԱԷԿ-ի շահագործման ժամկետը երկարացնելու որոշումը ՀՀ կառավարությունն ընդունել էր 2013թ. սեպտեմբերի 13-ին: Ավելի վաղ՝ սեպտեմբերի 3-ին, ՌԴ նախագահ Վլադիմիր Պուտինը, Հայաստանի նախագահ Սերժ Սարգսյանի հետ բանակցությունների արդյունքում, հայտարարել էր, որ «Ռոսատոմ» պետձեռնարկության մասնագետները կօգնեն անհրաժեշտ տեխնիկական նախագիծ կազմել:
ՀՀ ԱԷԿ-ը շահագործման էր հանձնվել 1976թ., 1989-ին կոնսերվացվել էր, իսկ 1995թ. վերագործարկվել էր ԱԷԿ-ի երկրորդ էներգաբլոկը՝ 407,5 մՎտ հզորությամբ:
