Արքայազն Չարլզը Լոնդոնում այցելել է Սբ. Եղիշե հայկական եկեղեցի, որտեղ իր վիշտն է արտահայտել Մերձավոր Արեւելքում քրիստոնյաների ողբերգական ճակատագրի առիթով, գրում է բրիտանական «The Daily Mail»-ը:

Եկեղեցում արքայազն Չարլզը զրուցել է Մեծ Բրիտանիայում Հայկական եկեղեցու հովվի՝ եպիսկոպոս Վահան Հովհաննիսյանի եւ Հայաստանի դեսպան Արմեն Սարգսյանի հետ:

Նշելով, որ Մերձավոր Արեւելքում քրիստոնյաները «հոգեմաշ ողբերգություն են ապրում»՝ արքայազն Չարլզն հայտարարել է, որ այժմ քրիստոնեությունը «տառացիորեն անհեթեթ ու բարբարոսական հարձակումների է ենթարկվում»:  «Իսկապես ցավալի է լսել քրիստոնյաների եւ նրանց եկեղեցիների վրա հարձակումների մասին, ինչպես ավելի վաղ այս տարի Դեր-Զորում հայկական եկեղեցու անիմաստ ու վայրագ ավերումն էր»,- ասել է արքայազն Չարլզը:

Ծառայության ժամանակ իրաքյան արքեպիսկոպոս Ավագ Ասատրյանը արծարծել է տարածաշրջանում հայ քրիստոնյաների խնդիրների մասին: «Հարձակումների հետեւնքով Իրաքի քրիստոնյաները լքում են իրենց նախնիների երկիրը: 1980թ. Իրաքում մոտ 1,5 մլն քրիստոնյա էր բնակվում, իսկ այսօր ԻԼԻՊ-ի հարձակումների հետեւանքով այդ թիվը հասել է 400 հազարի: Եթե մոտ ժամանակներս քաղաքական քայլեր չձեռնարկվեն, ապա Մերձավոր Արեւելքում արեւելյան քրիստոնյաների ներկայությունը կդադարեցվի հենց իրենց օրորոցում», - ասել է  նա: