Վիեննայում ՌԴ արտգործնախարար Սերգեյ Լավրովն ու ԱՄՆ-ի պետքարտուղար Ջոն Քերրին քննարկել են Իրանի եւ «վեցյակի» բանակցությունների ավարտական փուլի ընթացքը, փոխանցում է ՏԱՍՍ-ը՝ վկայակոչելով ՌԴ ԱԳՆ-ն:
Ըստ աղբյուրի՝ կողմերը քննարկել են իրանական միջուկային ծրագրի շուրջ իրավիճակը համակողմանի կարգավորելուն ուղղված քայլեր:
Բացի այդ, Սերգեյ Լավրովն Իրանի արտգործնախարար Ջավադ Զարիֆի հետ քննարկել է նաեւ Իրանի եւ «վեցյակի» տարաձայնությունները հարթելու հնարավոր քայլերը: «Հատուկ ուշադրություն է դարձվել հիմնական վիճելի պահերի հաղթահարմանը, որոնք խոչընդոտում են բանակցային որոշումների առաջխաղացմանը», - նշել են նախարարությունում: Լավրովը եւ Զարիֆը կարծում են, որ կարգավորման շնորհիվ կամրապնդվի միջազգային եւ տարածաշրջանային անվտանգությունը:
Հիշեցնենք, նոյեմբերի 23-ին Իրանը եւ «վեցյակը» հրաժարվել են համապարփակ համաձայնագրից եւ որոշել են սահմանափակվել շրջանակային համաձայնագրով:
Միջուկային բանակցություններն սկսվել էին նոյեմբերի 18-ին, իսկ նոյեմբերի 24-ին Իրանը եւ միջնորդ վեց երկրները՝ Ռուսաստան, ԱՄՆ, Ֆրանսիա, Գերմանիա, Մեծ Բրիտանիա եւ Չինաստան, պարտավորվել են երաշխիքների վերաբերյալ, ըստ որոնց՝ Իրանի ծրագիրն ունենալու է բացառապես խաղաղ բնույթ, փոխարենը վերացվելու են ԻԻՀ-ի դեմ պատժամիջոցները: