Վիեննայում միջազգային միջնորդների «վեցյակի» ընդհանուր հանդիպումից առաջ ընթանում են ԱԳՆ ղեկավարների բանակցությունները, փոխանցում է «ՌԻԱ Նովոստին»՝ վկայակոչելով ԱՄՆ-ի պատվիրակության աղբյուրը:
Գործակալությունը նշում է, որ ԱՄՆ-ի պետքարտուղար Ջոն Քերրին հանդիպումներ է ունեցել Չինաստանի ԱԳ նախարար Վան Ի-ի, «վեցյակի» համակարգող Քեթրին Էշթոնի հետ, իսկ այս պահին կայանում է նրա եւ Մուհամեդ Ջավադ Զարիֆի հանդիպումը:
Վկայակոչելով Իրանի պատվիրակության աղբյուրը՝ գործակալությունը հայտնում է, որ ավելի վաղ Զարիֆի հետ հանդիպել էր Էշթոնը: Տեղի են ունեցել նաեւ Վան Ի-ի հանդիպումները ՌԴ արտգործնախարար Սերգեյ Լավրովի եւ Մուհամեդ Ջավադ Զարիֆի հետ:
Նոյեմբերի 24-ին լրանում է այն ժամկետը, որի ընթացքում միջազգային միջնորդների վեցյակը եւ Իրանը պետք է երաշխիքների մասին համաձայնագիր մշակեն՝ Իրանի միջուկային ծրագրի բացառապես խաղաղ բնույթի եւ երկրի նկատմամբ միջազգային պատժամիջոցները վերացնելու կարգի վերաբերյալ: