ԼՂՀ վարչապետ Արայիկ Հարությունյանի մոտ այսօր տեղի է ունեցել խորհրդակցություն, որի ընթացքում ամփոփվել են հանրապետությունում ծխախոտագործության ոլորտում ունեցած այս տարվա արդյունքները, ինչպես նաեւ քննարկվել առկա խնդիրների լուծման ուղիներն ու գալիք տարվա անելիքները:
ԼՂՀ կառավարության աշխատակազմի տեղեկատվության եւ հասարակայնության հետ կապերի բաժնից հայտնում են, թե շահագրգիռ մարմինների եւ ծխախոտագործների մասնակցությամբ հրավիրված խորհրդակցությանը ներկայացված տվյալների համաձայն` ընթացիկ տարում մշակվել է շուրջ 100 հա ծխախոտի դաշտ, որի բերքատվությունն այնքան էլ գոհացուցիչ չէ` հիմնականում երաշտով պայմանավորված: Բերքի ցանկալի արդյունքին հասնելուն խանգարել են նաեւ ոռոգմանը եւ մթերմանն առնչվող որոշ հարցեր: Այս կապակցությամբ վարչապետ Ա. Հարությունյանը նշել է, որ ոռոգման հետ կապված անհրաժեշտ հանձնարարականներն արդեն տրված են արտադրական ենթակառուցվածքների զարգացման նախարարությանը եւ կարճ ժամանակահատվածում ստորգետնյա ջրային պաշարների օգտագործման միջոցով ընդհանուր առմամբ կլուծվի առավել շատ ծխախոտի դաշտեր ունեցող շրջանի` Մարտունու ոռոգման ջրի խնդիրը: Մարտունիում, վարչապետի խոսքով` կհիմնվի չորանոց, ինչը հնարավորություն կտա առանց խոչընդոտների ժամանակին մթերել արտադրանքը: Այս ամենին զուգահեռ վարչապետը հայտարարել է, որ կառավարությունը կորուստներ կրած ծխախոտագործներին աջակցելու նպատակով նրանց անտոկոս վարկ է տրամադրելու` պարտավորությունների մարման համար, ինչպես նաեւ երկու տարով ազատելու է ջրի վարձավճարից: Ոլորտի ծավալների կրկնապատկման վերաբերյալ նոր ծրագիր է մշակվում. Մարտունու շրջանում արդեն մոտ 163 հա, իսկ Ասկերանում` 60հա ծխախոտի դաշտեր մշակելու հայտեր կան ներկայացված: Կառավարության ղեկավարը խորհրդակցության ավարտին հորդորել է ճիշտ պլանավորել հետագա անելիքները, իսկ խոշոր ծխախոտագործներին հանձնարարել է կարգավորել բանվորների հետ աշխատանքային պայմանագրերի կնքման գործընթացը:
