2015 թվականին Հայաստանի Վերահսկիչ պալատը ստուգելու է Օպերայի եւ բալետի ազգային ակադեմիական թատրոնի բեմի արդիականացման ծրագիրը: Այս մասին նշված է Պալատի 2015թ. ծրագրում, որը հավանության է արժանացել խորհրդարանի ֆինանսավարկային եւ բյուջետային հարցերի մշտական հանձնաժողովի նոյեմբերի 25-ին նիստում: Հիշեցնենք, որ ծրագիրն իրականացվել է Ավստրիայի կառավարության տրամադրած միջոցներով:
Վերահսկիչ պալատը նաեւ ծրագրում է ուսումնասիրել հանրապետությունում շրջանառվող միջոցների օրինականությունն ու արդյունավետությունը, սոցիալական ծառայությունների կենտրոնների տարածքային ինտեգրման արդյունավետությունը, ինչպես նաեւ Հատուկ քննչական ծառայության միջոցների ծախսումը:
Պալատը կստուգի նաեւ օրենսդրական բարեփոխումների «Կարգավորիչ գիլյոտին» ծրագրի շրջանակում բյուջետային ծախսերը, որոնք անցկացնում է «Արտասահմանյան դրամաշնորհային միջոցներով օրենսդրության կարգավորման ազգային կենտրոն» պետական կազմակերպությունը:
Ջրային տնտեսության ոլորտում ծրագրվում է ստուգել մարզերում ջրամատակարարման բարելավմանն ուղղված վարկային երրորդ ծրագիրը, ինչպես նաեւ Հայաստանի հյուսիսում եւ Թուրքիայի հետ սահմանին հոսող Ախուրյան գետի ջրերի ինտեգրված կառավարման ծրագիրը: Այս ծրագիրն իրականացնում է Հայաստանի ջրային տնտեսության պետական կոմիտեի ջրային տնտեսության ծրագրերի իրականացման բյուրոն:
