Կիեւում եւ Մոսկվայում հերքել են ուկրաինական մամուլի տարածած այն լուրը, թե ՌԴ նախագահ Վլադիմիր Պուտինը Ուկրաինայի նախագահ Պյոտր Պորոշենկոյի հետ զրույցում պատերազմով է սպառնացել:
«Պյոտր Պորոշենկոյի դաշինքի» պատգամավոր, Ուկրաինայի նախագահի աշխատակազմի տեղեկատվական քաղաքականության վարչության նախկին պետ Իրինա Ֆրիզը հերքել է սպառնալիքների մասին լուրը, փոխանցում է BBC Ուկրաինան:
« Երեկ ՌԴ դեսպան Զուրաբովը ներկա չի եղել Պուտինի հետ Ուկրաինայի նախագահի հեռախոսազրույցին: Եվ այսպես, այդ մասին տեղեկությունը հավաստի չէ, ինչպես նաեւ այն, որ ինքիշխան պետության հասցեին որեւէ սպառնալիք է հնչել: Պյոտր Պորոշենկոյի հետ աշխատելով շուրջ 10 տարի՝ կարող եմ միայն հաստատել, որ նա երբեք ոչ ոքի թույլ չէր տա իր հետ զրուցել սպառնալից եւ ոչ կառուցողական տոնով եւ այլն», - գրել է նա Facebook-ում, մեջբերում է ՈՒՆԻԱՆ-ը:
«Ինտերֆաքսը» հայտնում է, որ ՌԴ նախագահի մամուլի քարտուղար Դմիտրի Պեսկովը հաստատել է Վլադիմիր Պուտինի եւ Պյոտր Պորոշենկոյի հեռախոսազրույցի փաստը: Միեւնույն ժամանակ Պեսկովը «մտացածին» է անվանել այն հայտարարությունը, թե ՌԴ նախագահն իբր սպառնացել է Դոնբասում Ուկրաինայի բանակի դիրքերի վրա հարձակմամբ: Ըստ Պեսկովի՝ երկու նախագահները քննարկել են երկկողմ հարաբերությունները, ինչպես նաեւ Ուկրաինայի հարավ-արեւելքի իրավիճակը:
Հիշեցնենք, որ Պորոշենկոյի հետ Պուտինի հեռախոսազրույցի մասին լուրը նոյեմբերի 26-ի երեկոյան տարածել էր ուկրաինական Insider թերթը: Այն հաստատել էր, որ այդ ժամանակ Պորոշենկոյի աշխատավայրում ներկա է եղել Կիեւում ՌԴ դեսպան Միխայիլ Զուրաբովը, եւ որ Մոսկվան պնդել է ԵՄ-ին եւ ՆԱՏՕ-ին Ուկրաինայի անդամակցության մերժման, ինչպես նաեւ ԴԺՀ-ն եւ ԼԺՀ-ն ճանաչելու վրա: