Չեմ պատրաստվում մտածել գաստարբայտերների մասին, ես մտածում են այն մարդկանց մասին, ովքեր ապրում են Հայաստանում. մեր առջեւ անվտանգության խնդիր կա: Այս մասին NEWS.am-ի թղթակցի հետ զրույցում հայտարարեց Քաղավիացիայի գլխավոր վարչության նախկին ղեկավար Շահեն Պետրոսյանը՝ անդրադառնալով հարցին, արդյո՞ք հիմնականում ռուսական ուղղությամբ ուղեւորահոսքի համար ավիատոմսերի գների զգալի նվազեցումն ավելի առաջնահերթ չէ, քան Հայաստանում ազգային ավիափոխադրողի առկայության եւ շուկայում ռուսական ընկերությունների էքսպանսիայի հարցերը:
Պետրոսյանի խոսքով, անբարեխիղճ մրցակցության շնորհիվ ռուսական ավիաընկերությունները դուրս մղեցին «Էյր Արմենիա»-ին: «Էյր Արմենիա»-ն բյուջե չունի: Տոմսերն էժանացան այն ուղղություններով, որոնցով չվերթներ էր իրականացնում նաեւ «Էյր Արմենիա»-ն: Երբ ընկերությունը դադարեցրեց չվերթները, այդ ուղղություններով վերականգնվեցին հին գները: Տոմսերը չէժանացան, դա խաբեություն է, ժամանակավոր երեւույթ, որի նպատակը մեր ավիափոխադրողին շուկայից դուրս մղելն էր»,- ընդգծեց Շահեն Պետրոսյանը:
Հիշեցնենք, որ «Հայկական ավիաուղիներ» պետական ընկերությունը սնանկացել է, իսկ վերջերս նույն ճակատագրին արժանացավ եւ մասնավոր «Արմավիա»-ն, ինչի արդյունքում Հայաստանը կորցրեց սեփական քաղաքացիական ավիացիան: «Էյր Արմենիա»-ն դադարեցրեց չվերթներ իրականացնել այս տարվա սեպտեմբերից: 2013 թվականի հոկտեմբերի 23-ին Հայաստանի կառավարությունը հայտարարեց բաց երկնքի քաղաքականության անցնելու գործընթացի մեկնարկի մասին, որը լուրջ փոփոխություններ է ենթադրում ավիափոխադրումների ոլորտում: Արդյունքում հիմնական ուղղություններով ավիատոմսերը զգալիորեն էժանացան: