Քննչական կոմիտեի ՀԿԳ քննության գլխավոր վարչությունում այսօր մեղադրանք է առաջադրվել Բյուրեղավանի գիշերօթիկի դպրոցի նախկին տնօրեն Գայանե Մարգարյանին եւ նրա նկատմամբ որպես խափանման միջոց է ընտրվել կալանավորումը: Այդ մասին NEWS.am-ին հայտնել է ՀՀ Քնչական կոմիտեի նախագահի խորհրդական Սոնա Տռուզյանը:
Գայանե Մարգարյանին մեղադրանք է առաջադրվել չարաշահումների համար Քր.օր.-ի 179 հոդվածի 2-րդ մասի 1-ին կետով (Յուրացնելը կամ վատնելը):
Բյուրեղավանի գիշերօթիկ դպրոցը վերջին շրջանում աղմկահարույց համբավ էր ձեռք բերել: Հիշեցնենք, որ ՄԻՊ գրասենյակը հաղորդագրություն էր տարածել, որում նշվում էր, որ Գիշերօթիկ հաստատությունում դաստիարակները, որպես պատժի միջոց, երեխաներին ստիպում են կանգնած վիճակում մասնակցել դասապրոցեսին: Օմբուդսմենի ներկայացուցիչներն ականատես էին եղել, թե ինչպես է ուսուցիչը գրչով հարվածում աշակերտներից մեկի մատներին եւ անվայել արտահայտություններով դիմում նրան: Բայացահայտվել էին նաեւ սննդի պահման պայմանների խախտումներ:
Ապրիլի 18-ին մի շարք ՀԿ-ներ, որոնց թվում նաեւ «Թրանսփարենսի Ինթերնեշնլ հակակոռուպցիոն կենտրոն»-ը, Բյուրեղավանի գիշերօթիկ դպրոցի աշխատակիցների՝ մամուլում հրապարակված բաց նամակի հիման վրա հանցագործության մասին հաղորդում էին ներկայացրել ՀՀ գլխավոր դատախազին:
Այս հաղորդման հետքերով գիշերօթիկ էր այցելել վարչապետ Հովիկ Աբրահամյանը եւ խիստ նկատողության արժանացրել Աշխատանքի եւ սոցիալական հարցերի փոխնախարար Ֆիլարետ Բերիկյանին: Աշխատանքից հեռացվել էր նաեւ գիշերօթիկ դպրոցի տնօրեն Գայանե Մարգարյանը: