Անհրաժեշտ է սերտացնել Հայաստանի եւ Ուրուգվայի միջեւ տնտեսական բնագավառում կապերը: Այս մասին, այսօր՝ դեկտեմբերի 9-ին, Ուրուգվայի Արեւելյան Հանրապետության փոխնախագահ, Սենատի նախագահ Դանիլո Աստորիի հետ հանդիպման ժամանակ նշել է Հայաստանի վարչապետ Հովիկ Աբրահամյանը:
Կառավարության մամուլի ծառայությունից հայտնում են, որ ողջունելով հյուրին կառավարությունում՝ վարչապետը նշել է, որ նման այցերը նպաստում են երկկողմ հարաբերությունների զարգացմանն ու ընդլայնմանը: Հովիկ Աբրահամյանը բարձր է գնահատել հայ-ուրուգվայական քաղաքական փոխգործակցության մակարդակը եւ ընդգծել տնտեսական բնագավառում կապերի սերտացման անհրաժեշտությունը:
Շնորհակալություն հայտնելով ընդունելության համար՝ Դանիլո Աստորին պատրաստակամություն է հայտնել անել հնարավորը երկու բարեկամ երկրների միջեւ տարբեր ոլորտներում համագործակցության հետագա խորացման համար:
Այդ համատեքստում զրուցակիցները քննարկել են տնտեսության տարբեր ոլորտներում կապերի խորացմանն ուղղված հարցեր: Մասնավորապես, կարեւորվել է հայ-ուրուգվայական բիզնես ֆորումի անցկացումը, ինչը նոր թափ կհաղորդի փոխադարձ ներդրումների ներգրավմանը, համատեղ ծրագրերի իրականացմանն ու առեւտրաշրջանառության ծավալների ավելացմանը:
Անդրադառնալով երկու ժողովուրդների միջեւ առկա բարեկամությանը՝ Հովիկ Աբրահամյանը շնորհակալություն է հայտնել Ուրուգվայի իշխանություններին՝ հայ համայնքի նկատմամբ ցուցաբերվող ջերմ վերաբերմունքի համար: Իր հերթին, Դանիլո Աստորին բարձր է գնահատել ուրուգվահայերի ներդրումն իր երկրի զարգացման գործում եւ նշել, որ նրանք արդյունավետ գործունեություն են ծավալում տարբեր ոլորտներում եւ նպաստում Ուրուգվայի բարգավաճմանը: