«Բաշնեֆտ» ընկերության բաժնետոմսերը յուրացնելու եւ անօրինական ճանապարհով ստացված գումարները լվանալու մեջ մեղադրվող՝ այս տարվա հուլիսից կալանքի տակ գտնվող հայ գործարար եւ բարերար Լեւոն Հայրապետյանը դեռ գտնվում է հիվանդանոցում. վիրահատությունից հետո նրան ստացիոնար բուժում է հարկավոր: Այս մասին NEWS.am-ին ասաց հայ գործարարի անձնական բժիշկ Հենրի Բակունցը:
«Վիճակը բավարար է, սակայն ասել, որ մեկ շաբաթում կլավանա, սուտ կլինի: Նրան ստացիոնար բուժում է հարկավոր, իսկ վիճակն այնպիսին է, որ նախաքննական մարմինը համաձայնվել է, որ նա պառկի հիվանդանոցում»,- ասաց Բակունցը:
Նշենք, որ Լեւոն Հայրապետյանը վիրահատվել է դեկտեմբերի 9-ին:
Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 12-ին Լեւոն Հայրապետյանին եւս մեկ մեղադրանք է առաջադրվել մեքենայության հոդվածով: Հոկտեմբերի 3-ին Մոսկվայի Բասմանի դատարանը փոխել է «Բաշնեֆտի» գործի ֆիգուրանտ, հայտնի հայ գործարար Լեւոն Հայրապետյանի խափանման միջոցը՝ կալանավորումը փոխարինելով տնային կալանքով։ Դեկտեմբերի 10-ին էլ դատարանը 4 ամսով երկարաձգել է կալանքի տակ մնալու ժամկետը:
