Ոստիկանությունը գտել է ամերիկյան Փենսիլվանիա նահանգում 6 մարդու սպանած տղամարդու մարմինը, հայտնում է ABC-ն: Նա 35-ամյա Բրեդլի Ուիլյամ Սթոունն է: Տղամարդու մարմինը հայտնաբերվել է անտառում՝ Փենսբերգի իր տնից ոչ հեռու: Հանցագործի մահվան պատճառները առայժմ անհայտ են: Ենթադրաբար նա նախկին զինծառայող է:
Ոստիկանության տվյալով՝ բոլոր զոհերը Սթոունի հետ «հարազատական» կապ ունեին: Նրանց թվում էր նրա նախկին կին 33-ամյա Նիկոլ Հիլը, վերջինիս մայրը՝ 57-ամյա Ջոան Հիլը եւ նրա քույր Պատրիցիա Ֆլիքը: Հայտնի է, որ 2009թ. ամուսնալուծությունից հետո ամուսինների միջեւ մշտական վեճ կար երկու դուստրերի խնամակալության թեմայով:
NEWS.am-ն ավելի վաղ հայտնել էր, որ Փենսիլվանիա նահանգում դեկտեմբերի 15-ի վաղ առավոտյան առնվազն հինգ մարդ է սպանվել: տեղի մամուլը հայտնել էր Մոնթգոմերի կոմսության տարբեր շրջաններում 2-3 միջադեպերի մասին: Նախնական տվյալով՝ դրանք բոլորը փոխկապակցված էին: