Հայաստանի ներքաղաքական վիճակը շարունակում է մնալ մտահոգիչ. քաղաքական դաշտն անկատար է եւ գաղափարակազուրկ: Այս մասին Հալեպում ՀՅԴ 124-րդ ամյակի միջոցառմանը հայտարարել է ՀՅԴ Բյուրոյի ներկայացուցիչ Հրանտ Մարգարյանը:
Նրա խոսքով՝ երկրում առկա այդ մտահոգիչ պայմանները նպաստավոր հող են ստեղծում հասարակական արդարացի դժգոհության, քաղաքական անկայունության և առճակատման համար։
«Եվ սրանից լավագույնս փորձում են օգտվել այնպիսի ուժեր, որոնց համար մեր ժողովրդի ծանր վիճակը լոկ միջոց է իրենց անձնական, խմբակային շահերի ապահովման համար։ Հայաստանի ներքաղաքական նման իրավիճակի հիմնական պատճառը քաղաքական դաշտի անկատարությունն է եւ գաղափարազրկությունը»,- ասել է Հրանտ Մարգարյանը
ՀՅԴ Բյուրոյի ներկայացուցչի կարծիքով՝ զարմանալի չէ, որ այս պայմաններում օտար ուժերից յուրաքանչյուրը ձգտում է ամրապնդել սեփական դերակատարությունը. «Հարկ է նկատի առնել ադրբեջանաթուրքական տանդեմի ակնհայտ քաղաքական հաջողությունները մեզ համար կենսական երեք ուղղություններում. ԵՄ խորհրդարանական կառույցներ, ՆԱՏՕ եւ Ադրբեջան- Ռուսաստան երկկողմ հարաբերություններ»:
Հրանտ Մարգարյանը համոզված է, որ Հայաստանն այս պահին գտնվում է անցման փուլում, իսկ այն կայանալու է նոր Սահմանադրության ընդունումով: Նրա խոսքով՝ սա պատմական հնարավորություն է եւ նոր Սահմանադրությամբ է, որ երկրում մենատիրությունը, անձի իշխանությունը պետք է փոխարինվի հավաքական իշխանությամբ, իսկ թե որքանով այդ իշխանությունը կարտահայտի ժողովրդի կամքը, արդեն հաջորդ քայլն է, որի մասին մենք պետք է մտածենք: Հալեպում ունեցած ելույթի ժամանակ Հրանտ Մարգարյանը հիշել է այն ուժերի մասին, որոնք դեմ են Սահմանադրական փոփոխություններին:
