Լոռու մարզի ըդնահնուր իրավասության դատարանը մերժել է Վանաձորում 2013թ.-ի հոկտեմբերի 12-ին դանակահարության պատճառով մահացած 15-ամյա Դավիթ Հովակիմյանի գործով կալանավորված՝ Լոռու մարզի գլխավոր վիրաբույժ Վլադիմիր Ղուկասյանի խափանման միջոցը փոխելու՝ փաստաբանի միջնորդությունը:
«Այսօր կայացած դատական նիստի ժամանակ միջնորդեցի, որ խափանման միջոցը փոխվի եւ Ղուկասյանը գրավի դիամց ազատ արձակվի: Սակայն դատարանը, հաշվի առնելով փաստը, որ գործով վկաներ կան, որոնք դեռ պետք է հարցաքննվեն, մերժեց մեր միջնորդությունը՝ հայտնելով, որ ազատության մեջ Վլադիմիր Ղուկասյանը կարող է ազդել վկաների վրա»,- NEWS.am-ի թղթակցի հետ զրույցում ասաց Ղուկասյանի փաստաբան Ռուբեն Հակոբյանը:
Նրա խոսքով՝ այսօր հարցաքննվել են գործով երկու վկաներ:
Դատական նիստը հետաձգվել է եւ նշանակվել դեկտեմբերի 25-ին:
Նշենք, որ Վլադիմիր Ղուկասյանին մեղադրանք է առաջադրվել այն բանի համար, որ նա՝ որպես բժիշկ-վիրաբույժ, իր մասնագիտական պարտականությունները դրանց նկատմամբ անփույթ եւ անբարեխիղճ վերաբերմունքի հետեւանքով կատարել է ոչ պատշաճ եւ անզգուշությամբ առաջացրել բուժվող հիվանդ Դավիթ Հովակիմյանի մահը:
Հիշեցնենք, որ ըստ ոստիկանության՝ 2013թ. հոկտեմբերի 12-ին, ժամը 19.35-ին, «Վանաձոր» բժշկական կենտրոն է տեղափոխվել Երեւանի բնակիչ, 15-ամյա Դավիթ Հովակիմյանը՝ «կրծքավանդակի ծակած վերք» ախտորոշմամբ: Նույն օրը ժամը 22.00-ի սահմաններում Դ. Հովակիմյանը հիվանդանոցում մահացել է: Մեկ օր անց ձերբակալվել է 1991թ. ծնված, նախկինում դատապարտված Կարեն Կունգուրցեւը՝ «Քուրդ» մականունով: Պարզվել է, որ նա հոկտեմբերի 12-ին ժամը 19.20-ի սահմաններում Վանաձորի Կ. Դեմիրճյան փողոցի հարեւանությամբ գտնվող այգում, վիճաբանության ժամանակ, դանակով հարվածել է Դ. Հովակիմյանին, որից հետո վերջինս հիվանդանոցում մահացել է: Գործն արդեն դատարանում է: Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար:
