Հայաստանի կառավարության աշխատակազմի ղեկավար-նախարար Դավիթ Հարությունյանը մտահոգ է թանկացումներով:
Այսօր` դեկտեմբերի 19-ին, ՀՀԿ ԳՄ նիստից առաջ լրագրողները նախարարից հետաքրքրվեցին` այդ դեպքում ինչու չի միացել այսօր կառավարության մոտ ցույց անող քաղաքացիներին: Դավիթ Հարությունյանը պատասխանեց. «Մտահոգությունը պարտադիր չէ արտահայտվի այն ձեւով, ոնց որ նշեցիք, այսինքն միանալով այդ քաղաքացիներին»:
Դավիթ Հարությունյանի խոսքով` գները կարգավորում է շուկան, իսկ իշխանությունների խնդիրն է վերահսկել, եւ տնտեսական մրցակցության պետական հանձնաժողովը հետեւում է դրան: Դիտարկմանը, թե վարչապետը կարծես թե կախարդական փայտիկով նվազեցրեց ապրանքների գները, նախարարը պատասխանեց. «Վարչապետն ուզում է պատկերացնել, թե ինչպես է աշխատում այդ համակարգը, այդ առումով ինքը տարօրինակ քայլ չի կատարել: Գոյություն ունի տնտեսական մրցակցության պետական հանձնաժողով, որը պարտավոր է վերահսկել շուկան, իսկ կառավարությունը կարող է հանձնարարականներ տալ»:
Նշենք, որ դեկտեմբերի 18-ին Հովիկ Աբրահամյանն անձամբ այցելել էր երեւանյան խոշոր սուպերմարկետներ, ծանոթացել իրավիճակին եւ հորդորել անհարկի թանկացումներ չանել:
