Դեկտեմբերի 25-ի երեկոյան ՀՀ տարածքային կառավարման եւ արտակարգ իրավիճակների նախարար Արմեն Երիցյանն աշխատանքային խորհրդակցություն անցկացրեց մարզպետների հետ:
ՏԿԱԻ նախարարն իր մտահոգությունը հայտնեց վերջին շրջանում գրանցված գնաճի վերաբերյալ եւ մարզպետների հետ քննարկեց մարզերում ստեղծված իրավիճակը, գների կայունացման գործընթացը: ՀՀ վարչապետի հանձնարարությամբ նախարար Երիցյանը մարզպետներին հորդորեց ամենօրյա ուշադրության կենտրոնում պահել մարզերում լայն սպառման` հատկապես պարենային ապրանքների գների հետ կապված իրավիճակը` կանխելով չարաշահումներն ու շահարկումները:
Քննարկվեցին մարզպետների լիազորությունների, տարածքային կառավարման համակարգի, մարզերում տեսչական գործունեության աշխատանքների համակարգման, համայնքներին հատկացվող դոտացիաների վերաբերյալ մարզպետների ներկայացրած առաջարկությունները:
Բարձրացված հարցերը քննարկելու եւ ներկայացված առաջարկություններն ամփոփելու նպատակով Ա. Երիցյանն առաջարկեց ստեղծել աշխատանքային խումբ:
Խորհրդակցության ընթացքում նշվեց, որ ՀՀ կառավարության կողմից հաստատվել են սոցիալական աջակցություն ստացող սահմանամերձ 32 համայնքների ցանկը եւ օժանդակության տրամադրման կարգը: Պետության սահմանած արտոնությունների թվում առաջին անգամ 2015 թ. ընթացքում աջակցություն ստացող համայնքների բնակիչ-բաժանորդները սպառած բնական գազի համար տարեկան մինչեւ 360 խմ ծավալի, ինչպես նաեւ մինչեւ 1440 կՎտ էլեկտրաէներգիայի դիմաց կվճարեն 50 տոկոսի չափով:
Այս հարցի վերաբերյալ թյուրըմբռնումներից խուսափելու նպատակով մարզպետներին առաջարկվեց խորհրդակցություններ անցկացնել ցանկում ընդգրկված համայնքների ղեկավարների, «Գազպրոմ Արմենիա», «Հայաստանի էլեկտրական ցանցեր» ՓԲ ընկերությունների տարածքային մասնաճյուղերի ներկայացուցիչների հետ եւ վերջիններիս ներկայացնել արտոնությունների տրամադրման կարգը:
Քննարկվեցին նաեւ երկրաշարժի հետեւանքով անօթեւան մնացած ընտանիքների համար Շիրակի մարզում մեկնարկած բնակարանների գնման վկայագրերի տրամադրման հարցը եւ ընթացիկ այլ խնդիրներ:
ՏԿԱԻ նախարարը տեղեկացրեց, որ տարեսկզբից շարունակելու է իր մարզային այլցելությունները, որոնց ընթացքում տեղում ծանոթանալու եւ լուծումներ է տալու բարձրացված խնդիրներին:
