Այսօր՝ հունվարի 25-ին, Քալիֆորնիական Գլենդել քաղաքի Սուրբ Մարիամ եկեղեցում Ավետիսյանների ընտանիքի սպանված անդամների հիշատակիցն նվիրված հոգեհանգստի պատարագ կմատուցվի: Այդ մասին գրում է հայ-ամերիկյան «Asbarez» թերթը:
Հոգեհանգստի պատարագը կմատուցվի Հայ հեղափոխական դաշնակցության արեւմտյան Ամերիկայի կենտրոնական կոմիտեի նախաձեռնությամբ: «Հայ հեղափոխական դաշնակցության արեւմտյան Ամերիկայի կենտրոնական կոմիտեն դատապարտում է Ավետիսյանների ընտանիքի սպանությունը, իր ցավակցություններն է ու կարեկացանքն է հայտնում Ավետիյանների ընտանիքին, Գյումրիի բնակիչներին եւ բոլոր հայերին», - ասվում է կազմակերպության հայտարարության մեջ:
Հիշեցնենք, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել հիվանդանոց, որտեղ 7 օր անց մահացել է։
Կասկածյալը՝ ռուս զինվորական Վալերի Պավելի Պերմյակովը ձերբակալվել է նույն օրը կեսգիշերին մոտ, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել են եւ մեղադրանք են առաջադրել Ռուսաստանի Դաշնության Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:
