Բնականոն զարգացում են ապրել Հայաստան-Իրան փոխշահավետ հարաբերությունները: Այդ մասին նշվում է ՀՀ ԱԳՆ տարեկան հաշվետվությունում: Հոկտեմբերի 20-21-ին տեղի է ունեցել ՀՀ վարչապետ Հովիկ Աբրահամյանի պաշտոնական այցը Իրան, որի ընթացքում վարչապետը հանդիպումներ է ունեցել ԻԻՀ նախագահի, նախագահի առաջին տեղակալի եւ ԱԳ նախարարի հետ:
Մայիսի 5-ին Իրանի արտգործնախարար Մոհամմադ Ջավադ Զարիֆի հրավերով պաշտոնական այցով Թեհրան է մեկնել ԱԳ նախարար Էդվարդ Նալբանդյանը: Այցի ընթացքում Էդվարդ Նալբանդյանը հանդիպումներ է ունեցել ԻԻՀ նախագահ Հասան Ռոհանիի, Մեջլիսի նախագահ Ալի Լարիջանիի եւ ԱԳ նախարար Մոհամմադ Ջավադ Զարիֆի հետ:
Դեկտեմբերի 15-16-ը Թեհրանում տեղի է ունեցել հայ-իրանական միջկառավարական համատեղ հանձնաժողովի տասներկուերորդ նիստը:
Տեղի են ունեցել նաեւ քաղաքական, իրավական, մշակութային եւ այլ ոլորտներում համագործակցությանը նվիրված մի շարք միջգերատեսչական փոխայցելություններ եւ հանդիպումներ: