ՀՀ տարածքային կառավարման եւ արտակարգ իրավիճակների նախարարության Հայաստանի հիդրոօդերեւութաբանության եւ մոնիթորինգի պետական ծառայությունը «Կամավոր համագործակցություն» ծրագրի շրջանակներում Համաշխարհային Օդերեւութաբանական Կազմակերպությունից (ՀՕԿ) ստացավ եւս 300 ռադիոզոնդ:
Հայաստանի ՏԿԱԻՆ մամուլի ծառայությունից հայտնում են, որ մթնոլորտի զոնդարկումը եղանակի՝ մասնավորապես վտանգավոր օդերեւութաբանական երեւույթների կանխատեսման համար ունի որոշիչ նշանակություն: Զոնդարկման տվյալները հնարավորություն են տալիս ստանալ մթնոլորտի ուղղաձիգ կտրվածքի ջերմաստիճանի, մթնոլորտային ճնշման, խոնավության, քամու ուղղության եւ արագության վերաբերյալ տեղեկատվություն: Բացի այդ, ստացված տվյալների եւ գետնամերձ շերտի ջերմաստիճանի միջոցով գնահատվում է տրոպոսֆերայի անկայունության էներգիայի չափը, որի մեծ արժեքը պայմանավորում է հզոր կույտ-անձրեւային ամպերի զարգացում, առատ տեղումների, ինչպես նաեւ փոթորկային քամիների առաջացում:
Վերջին տարիներին Հարավային Կովկասի տարածաշրջանում մթնոլորտի զոնդարկում կատարվում է միայն Հայաստանի Հանրապետությունում Երեւանի աէրոլոգիական կայանի կողմից` օրական մեկ անգամ, Գրինվիչի ժամանակով ժամը 00-ին: Հատկանշական է այն փաստը, որ կայանն ընդգրկված է Համաշխարհային Օդերեւութաբանական Կազմակերպության գլոբալ կլիմայական դիտարկումների համակարգի (GCOS) մթնոլորտի վերին շերտերի ուսումնասիրության գլոբալ ցանցում (GUAN): Երեւանի աէրոլոգիական կայանը ՀՕԿ-ի Եվրոպայի տարածաշրջանի կլիմայի մոնիթորինգի ենթատարածաշրջանային Կենտրոն է եւ իրականացնում է ամսական եւ սեզոնային կլիմայի մշտադիտարկում Հարավային Կովկասի տարածաշրջանի համար:
ՀՕԿ-ի Կամավոր համագործակցության ծրագրի շրջանակներում, Հիդրոօդերեւութաբանության եւ մոնիթորինգի պետական ծառայությունը 2014թ.-ի ընթացքում ստացել է 1200 ռետինե փուչիկ որոնց միջոցով իրականացվում է ռադիոզոնդերի բացթողումը մթնոլորտի վերին շերտեր, իսկ 2015թ.-ի հունվարին՝ եւս 300 ռադիոզոնդ, որոնց ընդհանուր արժեքը 36 մլն դրամից ավել է: Ռադիոզոնդերի ստացված քանակը հնարավորություն կընձեռի իրականացնել մթնոլորտի վերին շերտերի զոնդարկում:
Նշենք, որ ՀՕԿ-ի հետ սերտ համագործակցությունն ունի 10 տարվա պատմություն եւ Հարավային Կովկասի տարածաշրջանում բացառիկ է:
