ԵԿՄ նախագահ, գեներալ-լեյտենատ Մանվել Գրիգորյանը չի կասկածում, որ ռուսներն ավելի խիստ կվերաբերվեն Գյումրիում 7 անդամից բաղկացած ընտանիքի սպանության մեջ մեղադրվող Վալերի Պերմյակովի հետ։ Այս մասին այսօր՝ հունվարի 27-ին, լրագրողներին ասաց Մանվել Գրիգորյանը:
«Մեկ ա՝ ինչ լուծում էլ ստանա, միլիոն ձեւի քննդատվելու է, միլիոն ձեւի ասվելու է, բայց ես վստահ եմ, որ ռուսները պիտի փորձեն ճշմարտությունը հանել, որովհետեւ սա առաջինը իրենց հեղինակության, պատվի խնդիրն է, իրանք են եկել, մեր երկրում ծառայություն անում, ճիշտ է, մեր ազգի համար են ծառայություն անում, բայց իրենց ավելի շատ է պետք, որ ճշմարտությունը բացահայտվի»,- ասաց նա:
ԵԿՄ նախագահի կարծիքով՝ հանցագործի ազգությունը շեշտադրելով հարցը քաղաքականացվում է. «Երեխայի վրա զենք բարձրացնողը, էն էլ քնած տեղը, տան մեջ մտնողը, դրա մասին խոսք չկա, կապ չունի ազգությունը, հենց ազգությունը շեշտվում է, դա քաղաքականություն է, որովհետեւ դա կապ չունի՝ հայ էր, ռուս էր, ում բարեկամն էր։ Ես մի անգամ ասեցի, չէ՞՝ տենց մարդկանց պիտի չբռնեն էլ»:
Մանվել Գրիգորյանը կարծում է, որ այս դեպքից հետո սխալ կլինի Գյումրիից դուրս հանել ռուսական ռազմաբազան:
«Ռազմաբազան հեռացնելը մի քիչ կոպիտ բան է մեր համար, որովհետեւ մենք Թուրքիայի հետ սահման ունենք, համ էլ պայմանագիր ունենք, չի կարելի նման բան ասել, նամանավանդ, որ զինվոր է եկել, սահմանի վրա կանգնած է զենքով։ Դրա համար եմ ասում՝ որ ազգությունը պիտի թողնենք։ Հազարավոր ուրիշ ռուսներ էլ զենքը ձեռը կանգնած, սահմանի վրա մեր անդորրն են պաշտպանում։ Ազգությունը կապ չունի, կարող է՝ ռուս էլ չլիներ, որովհետեւ էդ բազայում ուրիշ ազգեր էլ են ծառայում, հայեր էլ կան։ Համենայնդեպս, դաժան էր, վատ էր, էդ 1915թ. ողբերգությունը ոնց որ մի հատ սաղիս շորշոփ տվեց, հիշատակեց, թե 100 տարի առաջ ինչ է եղել»,-ասաց նա:
