Ճապոնիայի վարչապետ Սինձո Աբեն կառավարության գլխավոր քարտուղար Եսիհիդե Սուգային եւ արտգործնախարար Ֆումիո Կիսիդեին կարգադրել է շարունակել Հորդանանի եւ այլ երկրների հետ փոխգործակցությունը՝ ԻՊ-ի գերության մեջ գտնվող ճապոնացի պատանդ Կենձի Գոտոյի ազատման ուղղությամբ։ Այս մասին լրագրողներին հայտնել է Եսիհիդե Սուգան։
«Այս ծանր իրավիճակում անհրաժեշտ է սերտորեն համագործակցել Հորդանանի եւ այլ երկրների հետ՝ Կենձի Գոտոյին ազատելու համար»,- հայտնել է Սուգան վարչապետի հանձանարարականը:
Ճապոնացի լրագրող Կենձի Գոտոն առեւանգվել է ԻՊ գրոհայինների կողմից: Կես շաբաթ առաջ համացանցում նրա եւ եւս մեկ ճապոնացի պատանդի՝ Հարունա Յուկավայի 200 մլն դոլար փրկագնի պահանջով տեսագրություն է հայտնվել: Գրոհայինները 72 ժամ ժամանակ են տվել: Ժամկետը լրանալուց մեկ օր անց համացանցում գլխատված մարմնով լուսանկար է հայտնվել, իսկ կադրից դուրս Գոտոյի ձայնը հայտնել է Յուկավայի մահապատժի մասին եւ փոխանցել խմբակցության նոր պայմանը՝ ազատել Հորդանանի բանտում գտնվող մահապարտ ահաբեկչուհի Սաջիդա ար Ռիշուային: Հինգշաբթի համացանցում հայտնված երրորդ հաղորդագրությունում հաղորդվել է, որ եթե Սաջիդան փոխանակման համար չբերվի Թուրքիայի սահմանի մոտ մինչեւ հունվարի 29-ի մայրամուտ, գրոհայինները սպառնում են սպանել դեկտեմբերի վերջին պատանդ վերցրած Հորդանանի ՌՕՈՒ-ի օդաչու Մուազ ալ Քասասբեհին:
Նշված ժամկետի ավարտից հետո անցել է շուրջ երկու օր, սակայն ոչ մի տեղեկություն թռիչքի կամ ճապոնացի լրագրողի մասին չի ստացվել: Հորդանանի իշխանությունները հայտարարել են փոխանակման վերաբերյալ իրենց պատրաստակամության մասին, միայն եթե ապացույցներ տրամադրվեն, որ օդաչուն ողջ է: