ԱԺ ԲՀԿ պատգամավոր Մարտուն Գրիգորյանը փետրվարի 9-10-ը ՌԴ պետդումա կատարած այցի ժամանակ բարձացրել է Ավետետիսյանների ընտանիքի 7 անդամներ սպանության մեջ մեղադրվող, 102-րդ ռազմաբազայի ռուս զինծառայող Վալերի Պերմյակովին ՀՀ արդարադատությանը հանձնելու հարցը: Այս մասին պատգամավորը լրագրողներին ասաց այսօր՝ փետրվարի 21-ին, Շիրակի գերեզմանատանը, որտեղ Ավետիսյանների հարազատների եւ մարզային իշխանությունների ներկայացուցիչների հետ այցելել էր Ավետիսյանների քառասունքին նրանց հիշատակը խնկարկելու։
«Ես Մոսկվայում այդ հարցը բարձրացրել եմ, որ զինվորը հանձնվի հայ իրավապահներին։ Պատասխանը, ցավոք, բացասական է եղել. պատրաստ չեն հանձնելու, բայց պատրաստ են համագործակցելու հայկական կողմի հետ, Հայաստանում համատեղ քննչական գործողություններ իրականացնելու հարցում։ Թե պատիժը կոնկրետ որտեղ է կրելու, հստակ պատասխաններ չտրվեցին»,- ասաց Մարտուն Գրիգորյանը:
Նշենք, որ Ավետիսյանների քառասունքի արարողությանը ներկա էր նաեւ մարզպետ Ֆելիքս Ցոլակյանը, որը լրագրողների հարցերին ի պատասխան ասաց, որ իր տեղեկություններով՝ Ավետիսյանների հարազատներին իրազեկում են քննության ընթացքի մասին։ Մարզպետը տեղյակ չէր, որ հարազատները դժգոհում են քննությունից եւ պնդում են, որ դրա ընթացքի մասին իրենց ոչինչ չեն ասում։
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել հիվանդանոց, սակայն դեպքից 7 օր անց հիվանդանոցում մահացել էր նաեւ նա: Այս գործով նույն օրը՝ կեսգիշերին մոտ, ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում: Հայաստանի Գլխավոր դատախազ Գեւորգ Կոստանյանը փետրվարի 3-ին նամակով դիմել էր Ռուսաստանի գլխավոր դատախազ Յուրի Չայկային՝ Ավետիսյանների ընտանիքի սպանության գործի վարույթը Հայաստանի իրավապահ մարմիններին փոխանցելու վերաբերյալ միջնորդությամբ: