Գյումրիում սպանված Ավետիսյանների ընտանիքի իրավահաջորդները դեռ չեն որոշել իրենց հետագա քայլերը: Այս մասին NEWS.am-ին ասաց տուժողի իրավահաջորդ, Ավետիսյանների դստեր ամուսին Եգոր Ադամյանը:
Նա հայտնեց, որ դեռ մյուս իրավահաջորդների հետ չեն քննարկել անելիքները:
«Անկեղծ, ոչ մի բան չենք որոշել: Երբ որոշվի, հանրությունն այդ մասին կիմանա»,- ասաց նա:
Նշենք, որ փետրվարի 25-ին հրավիրված մամուլի ասուլիսի ժամանակ Ավետիսյանների հարազատները հայտարարել էին, որ նույն օրը երեկոյան հավաքվելու են եւ որոշեն՝ գլխավոր դատախազություն դիմելու են, թե ոչ: Հիշեցնենք, որ Ավետիսյանների քառասունքին Հասմիկ Ավետիսյանների քույրը, որը նույնպես տուժողի իրավահաջորդ է, հայտնել էր, որ 3 օրից դիմելու են կտրուկ գործողությունների:
Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, ուր յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Մինչեւ օրս հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյոք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին:
