Փետրվարի 27-ի երեկոյան ՊԲ հյուսիսային ուղղությամբ տեղակայված զորամասերից մեկի պահպանության տեղամասի մարտական հենակետում, ըստ նախնական վարկածի, ինքնասպանություն գործած զինծառայող, Երեւանի բնակիչ, 19-ամյա Ալբերտ Սաֆարյանի ծնողները չեն հավատում ինքնասպանության վարկածին: Այս մասին NEWS.am-ի հետ զրույցում ասաց մահացած զինծառայողի հայրը՝ Էմիլ Սաֆարյանը, որին առավոտյան էին հայտնել որդու մահվան մասին։
«Զինկոմիսարիատում ասացին, որ տղաս ինքնասպանություն է գործել եւ ինքնասպանությունից առաջ նամակ է թողել: Տղայիս գրած նամակն ինձ զինկոմում ցույց չեն տվել, միայն բովանդակությունն են ասել՝ իբր մեր ընտանիքում խնդիրներ են եղել, և նա ինքնասպան է եղել այդ պատճառով: Ես այդ վարկածին չեմ հավատում և ամեն ինչ անելու եմ, որպեսզի ճշմարտությունը պարզեմ»,-ասաց նա:
Սաֆարյանների ընտանիքի հարևանները նույնպես չեն հավատում ինքնասպանության վարկածին. ընտանիքի մասին էլ միայն դրական են խոսում՝ բացառելով խնդիրները։
«Միշտ ժպտերես, ուրախ տղա էր: Բանակից չէր դժգոհում, ծնողների հետ վերջին անգամ մեկ շաբաթ առաջ էր հեռախոսով խոսել ու տեղեկացրել, որ այնտեղ ոչ մի խնդիր չունի ու ամեն ինչ լավ է: Մենք շատ մոտ հարևաններ ենք, շատ լավ ընտանիք են, առաջ քաշված վարկածը, իբր ընտանեական խնդիրների պատճառով է ինքնասպան եղել, սուտ է: Շատ լավ ընտանիք ուներ, որտեղ ոչ մի խնդիր էլ չկա»,-ասաց հարեւաններից Արսեն Գալստյանը:
Ալբերտն ընդամենը ութ ամսվա զինծառայող էր, մինչեւ բանակ զորակոչվելն էլ սովորել է Ֆինանսատնտեսական քոլեջի Ինֆորմացիոն տեխնոլոգիաների բաժնում:
«Ալբերտը հոր հետ մեկնել էր Ռուսաստան արտագնա աշխատանքի: Բայց երբ ծառայելու ժամանակն է եկել, վերադարձել է հայրենիք՝ պարտքը կատարելու»,-պատմեց հարեւանը։
Ալբերտի ֆիզկուլտուրայի ուսուցչուհին՝ Ծովինար Հարությունյանը, որը 9 տարի ճանաչել է Ալբերտին ու նրա ընտանիքին, մեզ հետ զրույցում ասաց, որ իր կարծիքով, Ալբերտը չէր կարող ինքնքասպան լինել, քանի որ «թուլամորթ երեխա չէր»:
«Շատ լավ, խիզախ, արտակարգ, բոլորին հասնող տղա էր: Նա թուլամորթ չէր, որ ինքնասպանություն գործեր, այդ վարկածը բացառվում է: Միշտ էլ պատրաստ էր հայրենիքին ծառայելու: Նրանց ընտանիքը օրինակելի հայ ընտանիքներից է, բոլորն էլ շատ լավ մարդիկ են, իրենց քրտինքով աշխատող»,-ասաց նա:
Ալբերտ Սաֆարյանը տան միջնեկ երեխան էր, ուներ ավագ եղբայր եւ կրտսեր քույր: Սաֆարյանների ընտանիքն ապրուստը վաստակում է արտագնա աշխատանքով։
Ավելի վաղ NEWS.am-ը հայտնել էր, որ փետրվարի 27-ին, ժամը 20:40-ի սահմաններում, N զորամասի պահպանության տակ գտնվող մարտական դիրքում, նույն զորամասի ժամկետային զինծառայող, շարքային Ալբերտ Էմիլի Սաֆարյանը, ըստ նախնական տվյալների, իրեն ամրակցված ինքնաձիգով մահացու հրազենային վնասվածք է հասցրել ինքն իրեն՝ ստորին ծնոտի շրջանում: Դեպքի առթիվ հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասով (ինքնասպանության հասցնելը), կատարվում է նախաքննություն:
