Ազգային ինքնորոշում միավորման նախագահ Պարույր Հայրիկյանն, ամենայն հավանականությամբ, կմասնակցի մարտի 1-ի հանրահավաքին: Այս մասին NEWS.am-ի թղթակցի հետ զրույցում ասաց Պարույր Հայրիկյանը:
Նա նշեց, որ ԱԻՄ-ը այդ մասով որոշում չի ընդունել, բայց ԱԻՄ-ականները ներկա կլինեն հանրահավաքին, Հայրիկյանը եւս հավանաբար կլինի հրապարակում: «ԱԻՄ-ը բավական նուրբ է վերաբերում մարտի 1-ին, ամեն տարի մասնակցում է զոհերի հիշատակին նվիրված միջոցառումներիբ, դա կարող է լինել ՀԱԿ-ի, ԲՀԿ-ի կամ մեկ այլ ուժի հանրահավաքը, դա կարեւոր չէ, մենք գնում ենք հրապարակ՝ զոհերի հիշատակը հարգելու եւ մարտի 1 երեւույթը դատապարտելու համար: Հարթակում անելու բան չունեմ, կլինեմ հրապարակում՝ ժողովրդի կողքին»,-ասաց Հայրիկյանը:
Հիշեցնենք, որ 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում: Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին, իսկ նույն օրը երեկոյան իշխանությունները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան: Մինչ օրս 10 զոհերի համար ոչ ոք պատասխանատվություն չի կրել:
