Travel.ru տուրիստական կայքը կազմել է Կանանց միջազգային օրը՝ մարտի 8-ը, անցկացնելու համար նախատեսված լավագույն քաղաքների վարկանիշային աղյուսյակը։

Աղյուսյակում ընդգրկված է 20 համեմատաբար էժան քաղաք, որոնք վերջին տարվա ընթացքում մեծ հեղինակություն են վայելում ինքնուրույն ճանապարհորդող զբոսաշրջիկների շրջանում։  Երկու հոգու համար նախատեսված ճանապարհորդության բյուջեն ընդգրկում է մարտի 8-9-ը ոչ թանկ հյուրանոցում գիշերակաց, ընթրիք սրճարանում կամ ռեստորանում եւ այցելություն տեղի տեսարժան վայրեր։

Երեւանը այս ցուցանիշներով զբաղեցրել է առաջին տեղը։ Հայաստանի մայրաքաղաքում նման ճանապարհորդության մեկ օրն արժի 34 եվրո։

Յուրահատուկ մշակութային կենտրոնն ու հյուրընկալ քաղաքը տոնական մթնոլորտ է ստեղծում։ Հայաստանի  մայրաքաղաքի գլխավոր տեսարժան վայրը Էրեբունի թանգարանն է՝ Արին բերդ բլրի ստորոտում։ Հենց այստեղ է մ.թ.ա. 782թ. հիմնադրվել ուրարտական Էրեբունի քաղաք-ամրոցը։ Երեւանը հին, հարուստ պատմությամբ եւ միաժամանակ երիտասարդ քաղաք է։ Մթնոլորտն այստեղ ներծծված է հույսով, հավատով եւ սիրով, ինչը հատկապես գնահատում են կանայք, գրում է կայքը։

Մարտի 8-ի մատչելի ճանապարհորդությունների համար նախատեսված քաղաքների լավագույն տասնյակում տեղ են գտել նաեւ հետեւյալ քաղաքները՝ Նովի Սադ (Սերբիա) – 41 եվրո, Վիտեբսկ (Բելառուս) – 42 եվրո, Բիտոլա (Մակեդոնիա) – 43 եվրո, Կոնստանցա (Ռումինիա) – 46 եվրո, Տարտու (Էստոնիա) – 47 եվրո, Գդանսկ (Լեհաստան) – 48 եվրո, Քութաիսի (Վրաստան) – 50 եվրո, Պլզեն (Չեխիա) – 51 եվրո, Կուանաս (Լիտվա) – 52 եվրո։

Իսկ ամենաթանկ քաղաքների եռյակում ընդգրկված են գերմանական Համբուրգը – 73 եվրո, ֆիննական Տուրկուն – 91 եվրո եւ  բելգիական Անտվերպենը – 95 եվրո։