Սիրիայի «Բաաս» կուսակցության տարածաշրջանային քարտուղարի տեղակալ Հիլալ Ալ Հիլալն ընդունել է Թուրքիայի խորհրդարանականներից, քաղաքական կուսակցությունների ներկայացուցիչներից եւ հասարակական գործիչներից կազմված պատվիրակությունը:
Ալ Հիլալը հայտարարել է, որ Սիրիան տարիներ շարունակ հարգել եւ մինչեւ հիմա հարգում է բարիդրացիական հարաբերությունների սկզբունքը եւ ցանկանում է հարեւան երկրների հետ հաստատել լավ քաղաքական, տնտեսական եւ սոցիալական հարաբերություններ: Այս մասին գրում է Սիրիայի պետական ՍԱՆԱ գործակալությունը:
Ալ Հիլալը նշել է, որ Սիրիան հարգոմ է թուրք ժողովրդին եւ բարձր է գնահատում թուրքական շատ կուսակցությունների եւ շարժումների վերաբերմունքը Սիրիայի հանդեպ, ինչն արտահայտում է տարածաշրջանային երկրների, այդ թվում՝ Թուրքիայի դեմ պլանավորած դավադրությունները գիտակցելու թփաստը: Նրա խոսքով՝ Սիրիան վճռականորեն պայքար է մղում ահաբեկչության դեմ եւ այդ պայքարում զգալի արդյունքների է հասել բանակի շնորհիվ:
Թուրքական պատվիրակության ղեկավար, Թուրքիայի աշխատավորական կուսակցության գլխավոր քարտուղար Դողու Փերինչեքը նշել է, որ պատվիրակությունը ներկայացնոմ է ողջ Թուրքիան, եւ պատվիրակությանը միավորում է սերը Սիրիայի հանդեպ, որը պայքար է մղում՝ պաշտպանելով ողջ աշխարհի ժողովուրդներին: Նա ընդգծել է, որ թուրք ժողովուրդը աջակցում է սիրիացիներին ահաբեկչության դեմ մղվող պայքարում:
Կուսակցության առաջնորդը նշել է, որ Սիրիայի Արաբական Հանրապետության նախագահ Բաշար Ասադի շնորհիվ Սիրիան դարձել է մի ուժ, որը կարող է դիմադրել համաշխարհային իմպերիալիզմին եւ նրա մերձավորարեւելյան նախագծին:
