Խորհրդային ժամանակաշրջանում Հայաստանի արտահանման աշխարհագրությունը փաստացի սահմանափակվում էր այն ժամանակվա «միութենական» հանրապետություններով, եւ հիմնականում ապրանքների հոսքը ուղղվում էր Ռուսաստան: Այժմ իրավիճակը փոխվել է:
Նախորդ տարվա տվյալներով՝ ԱՊՀ երկրների բաժինը Հայաստանի ընդհանուր արտահանման մեջ մոտ 24 տոկոս է կազմել: Ընդ որում, Ռուսաստանի ցուցանիշը կազմել է 20,3 տոկոս:
Միակ բանը, որ մնացել է անցյալից, մեր արտաքին առեւտրաշրջանառության մեջ Ռուսաստանի առաջատար դերն է: Մեր հյուսիսային հարեւանը, ինչպես հայտնի է, հայկական կոնյակի (այն ավանդաբար երկրորդ տեղն է զբաղեցնում ապրանքների արտահանման ծավալում), ինչպես նաեւ առանձին գյուղատնտեսական ապրանքների խոշորագույն գնորդներից մեկն է:
Վերջերս ՀՀ ազգային վիճակագրական ծառայությունը հրապարակել է այս տարվա հունվարին երկրում արդյունաբերության վիճակի մասին տեղեկատվությունը: Նշենք, որ ցուցանիշները բերված են առանց ԱԱՀ-ի եւ ակցիզային հարկի:
Այսպես, այս տարվա հունվարին արդյունաբերական ապրանքների արտահանումը տարեկան կտրվածքով կրճատվել է 15,4 տոկոսով: Ընդ որում, ԱՊՀ երկրների «մասնակցությունն» արտահայտվել է 6,8 տոկոսանոց անկմամբ, իսկ «մնացած երկրներինը»՝ 8,6 տոկոսանոց:
Ընդհանուր առմամբ, արդյունաբերական ապրանքների արտահանման ծավալը հունվարին տարեկան կտրվածքով կրճատվել է 4,8 մլրդ դրամով, այդ թվում ԱՊՀ երկրների գծով 2,1 մլրդ դրամով:
Դրանում հատուկ դեր է ունեցել «ըմպելիքների» արտահանման անկումը՝ 2,2 մլրդ դրամով, այդ թվում ԱՊՀ-ից՝ 1,5 մլրդ դրամով: Դրական ցուցանիշ է արձանագրվել ծխախոտի մասով, որի արտահանումն աճել է 1,2 մլրդ դրամով: Նկատենք, սակայն, որ ծխախոտ Հայաստանից գնում են «երրորդ երկրները», իսկ ԱՊՀ բաժինը հունվարին կազմել է միայն 0,1 տոկոս:
