Գյումրիում Ավետիսյանների ընտանիքի դաժան սպանության մեջ մեղադրվող ռուսական ռազմաբազայի զինծառայող Վալերի Պերմյակովի գործով դատահոգեբուժական փորձաքննություն է նշանակվել։ Այս մասին գրում է «Ինտեֆաքս»-ը՝ վկայակոչելով իր աղբյուրները։
«Փորձաքննությունը ընթանում է Հայաստանում ռուսական 102-րդ ռազմաբազայի տարածքում եւ պետք է ավարտվի մոտավորապես 2 շաբաթվա ընթացքում»,- ասել է գործակալության զրուցակիցը։ Նրա խոսքով՝ փորձագետները պետք է գնահատեն զինծառայողի հոգեբանական վիճակը եւ եզրակացություն կազմեն։ «Բոլոր այն խոսակցությունները, թե Պերմյակովի մոտ արդեն հոգեկան շեղումներ են հայտնաբերել, միայն շշուկներ են։ Փորձաքննության արդյունքները դեռ չկան»,- նշել է աղբյուրը՝ հավելելով, որ հետաքննությունը ընթանում է երկու երկրների իրավապահ մարմինների սերտ համագործակցությամբ։
Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակով, որի հանդեպ քրեական գործ է հարուցվել ռուսական եւ հայկական քրեական օրենսգրքերի համապատասխան հոդվածներով։ Նշենք, որ Պերմյակովը ընդունել է մեղքը։ Մինչեւ օրս Ավետիսյանների հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյոք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին