Եմենի հարավային Թայիզ քաղաքում մարտի 24-ին, շիա ապստամբները (հուսիներ) ցուցարարների վրա կրակ են բացել, որի հետեւանքով սպանվել է 2 մարդ, տասնյակ մարդիկ վիրավորվել են:

Ինչպես հաղորդում է Al Jazeera հեռուստաալիքը, ցուցարարները դժգոհություն են հայտնել, որ քաղաքն իրենց վերահսկողության տակ են առել հուսիները:

Ներկայումս տեղեկություններ են ստացվում, որ բախումներ են ընթանում հուսիների եւ երկրի նախագահ Աբդ Ռաբո Մանսուր Հադիին հավատարիմ բանակային ստորաբաժանումների միջեւ, հաղորդում է ՏԱՍՍ-ը:

Ավելի վաղ NEWS.am-ը հայտնել էր, որ մարտի 22-ին շիական «Անսար Ալլահ» խմբավորման 500 համախոհ հուսիներ գրավել են Եմենի Թայիզ քաղաքը։ «Ասար Ալլահ» զինված խմբավորումները մայրաքաղաք Սանայի մոտակայքում տեղակայված ռազմական բազայից ինքնաթիռներով տեղափոխվել են Թաիզ քաղաք։

Նշենք, որ Սանան ամբողջովին գտնվում է հուսիների վերահսկողության տակ, իսկ նախագահ Մանսուր Հադին տեղափոխվել է Ադեն։ Մի քանի օր առաջ շիա ապստամբները գրավել էին Սանայից դեպի նավահանգստային Ադեն քաղաք տանող ճանապարհին ընկած Թաիզ քաղաքը՝ իրենց վերահսկողությունը հաստատելով Եմենի՝ մեծությամբ 3-րդ քաղաքի վրա։ Հուսիներն իրենց հսկողության տակ են առել քաղաքի օդանավակայանն ու ավիաբազան։

Հիշեցնենք, որ մարտի 21-ին «Անսար Ալլահ» խմբավորումը համընդհանուր մոբիլիզացում էր հայտարարել։