Վալերի Պերմյակովի գործը գտնվում է անմիջապես ՌԴ նախագահի անձնական վերահսկողության ներքո: «Արմենպրեսի» փոխանցմամբ, այս մասին մարտի 29-ին Գյումրի կատարծ այցի ժամանակ նշել է ՌԴ Պետդումայի ԱՊՀ երկրների, եվրասիական ինտեգրման եւ հայրենակիցների հետ կապերի գործերով հանձնաժողովի նախագահի առաջին տեղակալ Օլեգ Լեբեդեւը:
Վերջինս անդրադառնալով Վալերի Պերմյակովին՝ հայկական կողմին փոխանցելու խնդրին, նշեց, որ այստեղ ամենակարեւորը վերահսկողությունն է, ինչն առկա է: «Այս գործի հանդեպ վերահսկողություն կա, եւ ոչ միայն խորհրդարանական ու միջխորհրդարանական հանձնաժողովների, այլ անմիջապես ՌԴ նախագահի կողմից: Երեք օրը մեկ քննչական կոմիտեի կողմից Նախագահին տեղեկացվում է գործի ընթացքի վերաբերյալ», ասաց նա: Պատասխանելով հարցին, թե ինչո՞ւ է գործը դանդաղ ընթանում, Լեբեդեւը տեղեկացրեց, որ 19 տարաբնույթ փորձաքննություն է իրականացվել, նրանցից շատերի անցկացման համար բավական ժամանակ է պետք:
ՌԴ Պետդումայի ԱՊՀ, եվրասիական ինտեգրման եւ հայրենակիցների հետ կապերի հարցերով հանձնաժողովի նախագահ Լեոնիդ Սլուցկին էլ նկատել է, որ Գյումրիում Ավետիսյանների ընտանիքի սպանության մեջ մեղադրվող Վալերի Պերմյակովի դատավարությունը տեղի կունենա ՀՀ տարածքում: Լեոնիդ Սլուցկին փաստել է, որ գործընթացի շուրջ արդեն իրականացվել է 4 հազար հարցաքննություն, ավելի քան 19 տարաբնույթ փորձաքննություն:
Լրագրողի հարցադրմանը, որ իրենք «տեղեկատվական բլոկադայի» մեջ են գործի քննության առումով, Սլուցկին պատասխանեց, որ դա այդպես չէ: «Մենք բոլորս ցավակցում ենք: Այս ողբերգությունը բոլորիս հիշողության մեջ կմնա ինչպես իրադարձություն, որը մենք մինչեւ վերջ չենք կարող ըմբռնել: Սա ցավ է, որի համար սգում եւ ցավակցում ենք: Դեպքի առաջին իսկ օրվանից մեր նախաձեռնությամբ ստեղծվեց համատեղ միջխորհրդարանական աշխատանքային խումբ, որը հետեւում է գործընթացին: Հասկանալի է` առաջին օրերի ընթացքում, ելնելով գործի նախաքննական ընթացքից, տեղեկատվությունն ավելի փակ էր, բայց ահռելի գործ է կատարվել այս ընթացքում», ասաց նա:
Խորհրդարանականը շեշտեց` ՌԴ քննչական մարմինները, համագործակցելով ՀՀ քննչական մարմինների հետ, շատ մեծ գործ են կատարել, կա մեծ առաջընթաց: «Ես իրավունք չունեմ բարձաձայնել քննության մանրամասները, բայց հայկական կողմի խնդրանքով զինվորական դատավարությունը լինելու է Հայաստանի տարածքում՝ Գյումրիում, իսկ դատավճիռն էլ կլինի համազոր»,- նշեց Լեոնիդ Սլուցկին՝ վստահեցնելով, որ հետագայում էլ քննչական գործընթացը կլինի ռուսական կողմի վերահսկողության տակ:
