Անհիշելի ժամանակներում Հռոմ ուխտագնության են մեկնել նաեւ հայերը: Հնագույն ժամանակաշրջանի վկայությունը խաչքարն է, որը հիմա գտնվում է Վատիկանի թանգարանում: Այս մասին նշվում է Rome Reports-ի ռեպորտաժում:
Խաչը թվագրվում է 1246 թվականով: Հիմա այն տեղադրված է Ուրբանոս VII Պապի անվան պատկերասրահում, Սիքստինյան կապելլայից մի քանի մետր հեռավորությամբ:
2014 թվականի սեպտեմբերին դրա տեղադրման արարողությանը ներկա էին Հայաստանի նախագահ Սերժ Սարգսյանը, ԱԳ նախարար Էդվարդ Նալբանդյանը, մշակույթի նախարար Հասմիկ Պողոսյանը:
Խաչը կանգնած է եղել այն տան մուտքի մոտ, որտեղ իջեւանել են հայերը: «Այն մուտքի մոտ է դրել տանը հետեւող հոգեւորականը: Այս խաչը զուտ ազգային ուրվագիծ ունի»,- նշել է Սուրբ Աթոռում Հայաստանի դեսպան Միքայել Մինասյանը:
Այդ տունն այլեւս չկա, սակայն խաչը դարեր անց գտնվել է եւ հիմա Վատիկանի թանգարանում է:
«Բացի հայերեն տառերից, խաչի վրա լատիներեն գրված է. այս խաչը սուրբ է»,- հավելեց դեսպան Մինասյանը:
Խաչն այնտեղ է տեղադրված եղել, որպեսզի հնարավոր լինի կանգնել եւ աղոթել՝ նախքան Սուրբ Պետրոսի շիրիմին մոտենալը: «Ապրիլի 12-ին հայերը կրկին կգան այստեղ՝ հարգելու Հայոց ցեղասպանության զոհերի հիշատակը»,- հայտարարել է Մինասյանը:
«Այդ իրադարձությունների հիշատակին Հռոմի Ֆրանցիսկոս Պապն ապրիլի 12-ին պատարագ կմատուցի: Իսկ այդ խաչն արդեն հավատքի եւ մի ամբողջ ժողովրդի փրկության խորհրդանիշ է դարձել»,- նշվում է Rome Reports-ի ռեպորտաժում:
Նշվում է նաեւ, որ ներկայում 1246 թվականով թվագրվող հայկական խաչքարը, որը հայտնաբերվել է 17-րդ դարում՝ Վատիկանի Սուրբ Պետրոսի հրապարակի մերձակայքում, տեղադրված է Ուրբանոս VII Պապի անվան պատկերասրահում, աշխարհահռչակ Սիքստինյան կապելլայից մի քանի մետր հեռավորությամբ:
