Արցախի Հանրապետությունը գրավում է ինչպես ԱՊՀ-ից, այնպես էլ հեռավոր արտերկրից զբոսաշրջիկներին: Սինգապուրից զբոսաշրջիկը NEWS.am-ի թղթակցի հետ զրույցում այցելությունից տպավորություններն է կիսել:

Վիկտոր, պատմեք խնդրեմ, ե՞րբ եւ ի՞նչ առիթով եք այցելել Լեռնային Ղարաբաղ:

Լեռնային Ղարաբաղի Հանրապետությունում եղել եմ 2014 թվականի սեպտեմբերին: Սա իմ առաջին այցն էր այդ երկիր: Ինձ համար ամենից հետաքրքիր վայրը «Տատիկի եւ Պապիկի» («Մենք ենք, մեր լեռները» հուշարձանը, որը Լեռնային Ղարաբաղի խորհրդանիշն է դարձել) արձանի բլուրն է: Այդ հուշարձանն ինձ յուրահատուկ է թվում: Ես նաեւ Շուշիում եւ Վանքում եմ եղել: Ինձ չափազանց տպավորեց Գանձասարի վանքը:

Ի՞նչ տպավորություններ ունեք երկրից եւ նրա բնակիչներից:

Երկիրը բավականաչափ անվտանգ է հանցավորության ցածր մակարդակի առումով: Արցախի բնակիչներն էլ շատ ընկերասեր եւ բարեհամբույր են: Ինձ համար՝ որպես օտարերկրացու, դժվար էր, քանի որ մեծ մասն անգլերեն չի խոսում: Դա հաղորդակցման խնդիրներ է առաջացնում նրանց համար, ովքեր չեն տիրապետում հայերենին կամ ռուսերենին: Օրինակ՝ Ստեփանակերտում զբոսնելիս գեղեցիկ կնոջ հանդիպեցի, սակայն չկարողացա ծանոթանալ նրա հետ, քանի որ վատ էր խոսում անգլերեն:

Կցանկանայի՞ք նորից այցելել Արցախ:

Կախված է հանգամանքներից: Հիմա տրանսպորտային միակ միջոցը Երեւանից մեկնող ավտոբուսն է, եւ այցելությունը շատ ժամանակ է խլում՝ շուրջ 7 ժամ: Քանի որ ես արձակուրդ եմ վերցնում հատուկ տուրիստական շրջագայության նպատակով, ժամանակն ինձ համար շատ թանկ է: