«Նաիրիտ» գործարանը պետք է վերածել համահայկական բաժնետիրական ընկերության։ Այս մասին ապրիլի 15-ին լրագրողներին հայտարարել է տնտեսագիտական գիտությունների դոկտոր Թաթուլ Մանասերյանը։
Նրա խոսքով՝ գործարանը վերականգնելը շատ կարեւոր է Հայաստանի տնտեսության համար, սակայն չոր հաշվարկներով անելը դա բարդ է։ «Նաիրիտը» վաղուց չի գերիշխում սինթետիկ կաուչուկի շուկայում այն բանից հետո, երբ այդ շուկա է մտել Չինաստանը։ Ոչ մի ներդրող չի համաձայնվի հարյուր միլիոնավոր դոլարներ ներդնել մի գործարանի մեջ, որի սպառման շուկան երաշխավորված չէ։
«Ես հնարավոր եմ համարում գործարկել գործարանը այն վերածելով համահայկական նախագծի։ Սակայն ոչ բարեգործական նախագծի։ Ակցիաների թողարկումը պետք է ուղեկցվի մանրամասն բացատրությամբ, որտեղ պետք է քննարկվեն բոլոր իրավունքներն եւ պարտավորությունները։ Քանի որ բաժնետերերը թեպետ եւ լինելու են հայերը, բայց նրանք ներդրողներ են»,- նշել է Մանասարյանը։