Հայաստանի արդարադատության նախարար Հովհաննես Մանուկյանին այսօր՝ ապրիլի 16-ին, կզեկուցեն «Հիմնադիր խորհրդարանի» կալանավորված անդամների պահման պայմանների մասին: Այս մասին, այսօր կառավարության նիստից հետո լրագրողներին հայտնեց ինքը՝ նախարարը:
«Մենք արձագանքում ենք մամուլի բոլոր հրապարակումներին, որոնք վերաբերում են մեր աշխատանքին, այդ թվում ՔԿՀ-ների իրավիճակին: Ես ծանոթ եմ հրապարակումներին, որ 27 մարդու պահում են 8 մարդու համար նախատեսված խցում: Ես հանձնարարել եմ պարզել պահման պայմանները եւ հենց այսօր այդ տվյալները կներկայացնեն ինձ»,-ասել է նախարարը:
Ավելի վաղ NEWS.am-ը հայտնել էր, որ «100-ամյակն առաց ռեժիմի» շարժումն ապրիլի 7-ին հայտարարել է, որ առավոտյան ժամը ժամը 6:35-ի սահմաններում Հիմնադիր խորհրդարանի շենք են ներկայացել իրավապահ մարմինների շուրջ երկու տասնյակ աշխատակիցներ եւ խուզարկություն են իրականացնում: Խուզարկություններ են անցկացվել նաեւ ՀԽ անդամների տներում, որից հետո բերման են ենթարկվել Ժիրայր Սեֆիլյանը, Վարուժան Ավետիսյանը, Պավել Մանուկյանը, Հայկական վերածնունդի Լիբանանյան ներկայացուցիչ Թորոս Սեֆիլյանը (Ժիրայր Սեֆիլյանի եղբայր), Հովհաննես Ղազարյանը, Արամ Հակոբյանը, Գեւորգ Սաֆարյանը։
Իր հերթին ՀՀ Քննչական կոմիտեն հաղորդագրություն է տարածել, որում ասվում է, որ ՀՀ ազգային անվտանգության ծառայության եւ ՀՀ քննչական կոմիետի համատեղ ձեռնարկած միջոցառումների արդյունքում կանխվել է 2015թ. ապրիլի 24-ին հրապարակային միջոցառումների անցկացման վայրերում զանգվածային անկարգությունների կազմակերպումը:
