Վերակազմյալ ՍԴՀԿ-ն կոչ է անում ՀՀ կառավարությանը ձեռնարկել անհրաժեշտ քայլեր սիրիահայերի դժվարին կացությունը մեղմելու, այդ թվում նրանց` Հայաստան տարհանումը կազմակերպելու ուղղությամբ: Այս մասին հայտարարություն է տարածել Վերակազմյալ ՍԴՀԿ ատենապետ Լյուդմիլա Սարգսյանը:
Հայտարարությունում նաեւ ասվում է.
«Վերջին օրերին կրկին աղետագույժ լուրեր են ստացվում Հալեպից, որտեղ ահաբեկիչների հրթիռակոծությանն ու հարձակումներին են ենթարկվում քաղաքի հայկական թաղամասերը: Զոհերի եւ վիրավորների թվում կան նաեւ մեր հայրենակիցների անունները:
Ահաբեկիչ ծայրահեղականների հերթական դժնի գործողությունների արդյունքում ավերվել կամ վնասվել են մեր հայրենակիցներով բնակեցված շենքեր, հայկական կրթամշակութային օջախներ, մասնավոր գույք: Հայոց ցեղասպանության 100-ամյա տարելիցի նախաշեմին մենք ականատեսն ենք լինում երբեմնի հայկական ծաղկուն գաղթօջախի անկման եւ աստիճանական հայաթափման:
Չնայած Սիրիայի իշխանությունների կողմից ձեռնարկված միջոցառումներին`ուղղված ազգային եւ կրոնական փոքրամասնությունների, այդ թվում հայերի անվտանգության հնարավորին ապահովմանը` իրավիճակը Սիրիայում շարունակում է մնալ խիստ լարված եւ վտանգում է սիրիահայ համայնքի հետագա գոյությունը:
Այս պայմաններում ՀՀ իշխանությունները քաղաքական եւ բարոյական պարտավորություն ունեն հնարավոր ամեն միջոց ձեռք առնել սիրիահայ համայնքին աջակցելու նպատակով, այդ թվում Հալեպ եւ պատերազմի թատերաբեմում հայտնված սիրիահայ այլ գաղթօջախներ ուղարկել մարդասիրական օգնություն, առաջին անհրաժեշտության ապրանքներ, ըստ հնարավորության` տրամադրել նաեւ ֆինանսական աջակցություն: ՀՀ կառավարությունը պետք է դիտարկի նաեւ սիրիահայերի` Հայաստան զանգվածային ներգաղթը խթանող քայլերի ձեռնարկման հնարավորությունը. հայրենիքում հաստատվելը սիրիահայ մեր շատ հայրենակիցների համար կլինի կյանքի եւ գույքի ապահովության օպտիմալ միջոց: Հայաստանի Հանրապետությունը չի կարող պասիվություն դրսեւորել եւ բախտի քմահաճույքին թողնել քաղաքացիական պատերազմի բովում հայտված սիրիահայ հայրենակիցներին:
Վերակազմյալ սոցիալ-դեմոկրատ հնչակյան կուսակցությունը, իր զորակացությունը հայտնելով սիրիահայ հայրենակիցներին, միաժամանակ անբավարար է գնահատում ՀՀ կառավարության գործունությունը սիրիահայերին աջակցելու եւ նրանց անվտանգութոյւնն ապահովելու ուղղությամբ: Կուսակցությունը կոչ է անում ՀՀ կառավարությանը ձեռնարկել անհրաժեշտ քայլեր սիրիահայերի դժվարին կացությունը մեղմելու, այդ թվում նրանց` Հայաստան տարհանումը կազմակերպելու ուղղությամբ: