ԱՄՆ Պետդեպարտամենտի ներկայացուցիչները դիմել են Sony Pictures ընկերությանը ռուսական քարոզչամեքենային հակազդելու համար օգնություն ստանալու նպատակով։ Այս մասին են վկայում ԱՄՆ փոխպետքարտուղար Ռիչարդ Սթենգելի եւ ընկերության գլխավոր տնօրեն Մարկ Լինգթոնի միջեւ նամակագրությունը, որը հրապարակել է Wikileaks-ը։
«Ինչպես գիտեք, մենք շատ խնդիրներ ունենք Մերձավոր Արեւելքում ԻՊ գործողությունների եւ Արեւելյան Եվրոպայում Ռուսաստանի գործողությունների հետ։ Երկու դեպքում էլ այս տարածաշրջանում միլիոնավոր մարդիկ իրականության մասին աղավաղված տեղեկություն են ստանում»,- ասված է Սթենգելի նամակներից մեկում։ Sony ընկերության ներկայացուցիչը, դրան ի պատասխան, խորհուրդ է տվել այդ պայքարի մեջ ներգրավել Disney եւ Fox ընկերությունների մեդիա մասնագետներին։
ԱՄՆ Պետքարտուղարության պաշտոնական ներկայացուցիչ Մարի Հարֆը հաստատել է, որ Պետդեպարտամենտը ԻՊ դեմ պայքարելու համար համագործակցում է «կառավարության հետ կապ չունեցող սոցիալական մեդիայի եւ ժամանցային միջոցառումներ կազմակերպող ընկերությունների հետ», գրում է Gazeta.ru-ն։
«Ռուսական քարոզչության մակարդակի կապակցությամբ նույնպես մարտահրավերներ կան, ինչպես Ուկրաինայում Ռուսաստանի գործողությունների մասին բացահայտ սուտ տեղեկատվության տարածում»,- նշել է Հարֆը։