Ապրիլի 22-23-ին «Ցեղասպանություն հանցագործության դեմ» համաշխարհային հասարակական քաղաքական ֆորումը Երեւանում կբացի Հայաստանի նախագահը։ Այս մասին ապրիլի 20-ին կայացած մամուլի ասուլիսի ժամանակ հայտարարել է ՀՀ ԱԳ փոխնախարար Կարեն Նազարյանը։
Նրա խոսքով՝ ֆորումի նպատակն է լրացնել եւ նպաստել Հայաստանի արտաքին քաղաքական առաջնայնությունները՝ եւս մեկ անգամ միջազգային մակարդակով քննարկման թեմա դարձնելով աշխարհում նման հանցագործությունների ամբողջական բացառման եւ կանխման մեխանիզմները։ «Մենք սպասում ենք, որ ֆորումի ժամանակ ելույթ կունենան ԱԺ նախագահը, վարչապետը, ՀՀ արտգործնախարարը, Կառավարության անդամները, խորհրդարանի պատգամավորները։ Սպասվում է, որ ֆորումին կմասնակցեն միջկառավարական վեհաժողովների ներկայացուցիչներ, միջազգային իրավունքի հայտնի մասնագետներ, իրավապաշտպան կազմակերպությունների ներկայացուցիչներ»,- նշեց Նազարյանը։
Փոխարտգործնախարարը հիշեցրել է, որ երկօրյա միջազգային ֆորումը պլանավորվում է անցկացնել ինտերակտիվ քննարկումների եւ մեկ լիագումար նիստի ձեւով։ «Առաջին թեման նվիրված կլինի մարդկության դեմ հանցագործությունների կանխման մեխանիզմներին։ Հատուկ ուշադրություն կհատկացվի զանգվածային բռնության տարբեր դրսեւորումների ուսումնասիրությանը, Երկրորդ նիստը նվիրված կլինի ցեղասպանության հետեւանքներին»,- ասաց Նազարյանը։
Ապրիլի 23-ին «Խորհրդարանականներն ընդդեմ ցեղասպանության» լիագումար նիստի ընթացքում ակնկալվում է, որ ելույթ կունենան տարբեր երկրների պատգամավորներ։ «Երեւանում կայանալիք ֆորումի մասշտաբները աննախադեպ են լինելու։ Սպասում եք, որ դրան կմասնակցի 600 մարդ։ Քննարկումները կլուսաբանվեն թե՛ հայկական, թե՛ արտասահմանյան լրատվամիջոցներում։ Ֆորումին կից լինելու է նաեւ ցուցահանդես՝ նվիրված Հայոց ցեղասպանությանն ու առհասարակ բոլոր ցեղասպանություններին»,- հավելեց Կարեն Նազարյանը։