Մեքսիկայում Թուրքիայի դեսպանատանը պետական եւ կառավարական շրջանակների վրա ճնշման արդյունքում հաջողվել է դադարեցնել Մեխիկոյի Մշակույթների ազգային թանգարանում անցկացվող կինոփառատոնը: Ըստ Prensa Armenia-ի, կինոփառատոնին պետք է ցուցադրվեին «Տատիկիս դաջվածքները», «Արտույտների ագարակը», «Սպի», «Արարատ» եւ այլ ժապավեններ:
«Հայոց ցեղասպանությունից 100 տարի անց նրանք կրկին փորձում են խլացնել խոսքը: Թուրքական այժմյան կառավարությունը ձգտում է ցանկացած միջոցով կանխել «ցեղասպանություն» բառի օգտագործումը»,- Հիշողության եւ հանդուրժողականության թանգարանում «Հայաստան. բաց վերք» ցուցահանդեսի բացման ժամանակ հայտարարել է պրոֆեսոր Կառլոս Անթառամյանը:
Աղբյուրների համաձայն, Մեքսիկայի ԱԳ նախարարությունը, թուրքական դիվանագետների կողմից ճնշումների արդյունքում, փորձել է այլ միջոցառումների շրջանակում նույնպես կանխել «ցեղասպանություն» բառի օգտագործումը:
«Մեքսիկական կառավարությունը ոչ միայն չի ճանաչում Հայոց ցեղասպանությունը, այլեւ ինչ-որ ազդեցիկ մեկը վերջին օրերին շահագռգռված է Հայոց ցեղասպանության հիշատակի միջոցառումների խլացմամբ, որոնք կազմակերպում է Մեքսիկայի հայ համայնքը»,- հավելել է Անթառամյանը: