Ռուսաստանցի հաքերները հարձակում են իրականացրել Սպիտակ տան համակարգչային ցանցի վրա եւ հիմա նրանց հասանելի են ԱՄՆ նախագահ Բարաք Օբամայի էլեկտրոնային նամակները: Այս մասին հաղորդում է New York Times-ը՝ վկայակոչելով անունները նշել չցանկացող պաշտոնյաների:
Պարբերականի տվյալներով, հաքերներն Օբամայի էլեկտրոնային փոստի միայն մի մասն են ստացել: Տվյալներ, որ հասարակությանը գաղտնի տեղեկատվություն է հայտնի, Սպիտակ տունը չունի:
ՌԻԱ Նովոստիի փոխանցմամբ, ապրիլի սկզբին ամերիկյան CNN հեռուստաալիքը հաղորդել էր Սպիտակ տան գաղտնի համակարգչային համակարգ հաքերների ներթափանցման մասին՝ նշելով, որ նրանք «աշխատում են ռուսական կառավարությունում»: Սպիտակ տան Ազգային անվտանգության խորհրդի ներկայացուցիչ Մարկ Ստրոխն ավելի ուշ պարզաբանել էր, որ խոսքն անցյալ տարվա իրադարձությունների մասին է:
Պենտագոնի ղեկավար Էշթոն Քարթերը նաեւ խոսել էր ենթադրյալ ռուսաստանցի հաքերների մասին, որոնք այս տարի կոտրել են Պաշտպանության նախարարության սերվերները: Նրանք, սակայն, գաղտնի տեղեկատվություն կորզել չեն կարողացել:
