Ապրիլի 30-ին ՀՀ պաշտպանության նախարարի առաջին տեղակալ Դավիթ Տոնոյանի գլխավորած պատվիրակությունը ՆԱՏՕ-ի կենտրոնակայանում մասնակցել է Քաղաքական եւ Անվտանգության Համագործակցության կոմիտե + Հայաստան ձեւաչափով հանդիպմանը:
Հանդիպման ընթացքում դաշինքի անդամ եւ գործընկեր երկրների ներկայացուցիչներին Հայաստանի պատվիրակությունը ներկայացրեց Հայաստանում իրականացվող պաշտպանական բարեփոխումների ընթացքն ու հեռանկարները, քննարկվեց եւ համաձայնեցվեց պլանավորման եւ վերանայման գործընթացի շրջանակներում արձանագրված առաջընթացը: Բարձր գնահատվեցին Հայաստանի մասնակցությունը ՆԱՏՕ-ի գործողություններին, պաշտպանական կրթության, կառավարման, թափանցիկության ընդլայնման, զինված ուժերում մարդու իրավունքների եւ բարեվարքության ամրապնդման, ժողովրդավարական վերահսկողության եւ այլ բնագավառներում իրականացված պաշտպանական բարեփոխումները, կարեւորվեց ՆԱՏՕ-ի հետ համագործակցության շարունակականության ապահովումը:
Նույն օրը հանդիպում տեղի ունեցավ ՆԱՏՕ-ի գլխավոր քարտուղարի՝ քաղաքական եւ անվտանգության հարցերով տեղակալ, դեսպան Ստամատոպուլոսի հետ: Փոխանակվեցին կարծիքներ ՆԱՏՕ-ի հետ համագործակցության հեռանկարների, միջազգային եւ տարածաշրջանային անվտանգության շուրջ: Հայաստանը ՆԱՏՕ-ի Միջազգային քարտուղարությանը հանձնեց Բարեվարքության ամրապնդման ինքնագնահատման հարցաշարի պատասխանները: Պայմանավորվածություն ձեռք բերվեց ինքնագնահատման արդյունքների հիման վրա ՆԱՏՕ–ի փորձագիտական խմբի կողմից պատասխանների ուսումնասիրության եւ համապատասխան առաջարկությունների վերաբերյալ: Երկուստեք կարեւորվեց այս ուղղությամբ համագործակցության ամրապնդման եւ խորացման անհրաժեշտությունը: Դիտարկվեցին Բարեվարքության ամրապնդմանն ուղղված այլ քայլերի ձեռնարկման հնարավորությունները:
