Ես քվեարկել եմ Արցախի ժողովրդավարական ապագայի համար եւ համարում եմ, որ դա միայն խոսքեր չեն։ Այս մասին այսօր՝ մայիսի 3-ին, ԼՂՀ խորհրդարանական ընտրություններին քվեարկությունից հետո, լրագրողների հետ զրույցում հայտարարել է ԼՂՀ խորհրդարանի նախագահ Աշոտ Ղուլյանը, ով իր քվեարկությունը կատարել է թիվ 1/8 ընտրատեղամասում։ Նրա խոսքով, նախընտրական արշաը ցույց տվեց, որ ժողովրդի համար շատ կարեւոր է երկրում խաղաղության ու ժողովրդավարության առկայությունը։ (ֆոտոռեպորտաժ)

«Ընտրությունները ժողովրդի համար ցանկալի արդյունքի հասնելու հնարավորություն են»,-ասել է Ղուլյանը։

Հարցին, թե ընտրությունների արդյունքում խորհրդարանում քաղաքական ուժերի համամասնությունը կփոխվի՞, նա պատասխանել է, որ փոփոխություններ, իհարկե, կլինեն, սակայն հիմնական պատկերը կպահպանվի։

«Ընտրությունների արդյունքում խորհրդարան կանցնեն նաեւ ընդդիմադիր ուժեր, որի մասին է վկայում քաղաքական ուժերի նախընտրական ակտիվությունը»,-ասել է Ղուլյանը։

Հիշեցնենք, որ այսօր՝ մայիսի 3-ին, ԼՂՀ-ում տեղի են ունենում խորհրդարանական ընտրություններ։ ԼՂՀ ԱԺ 33 մանդատների համար պայքարում են համամասնական համակարգով 7 քաղաքական կուսակցություններ՝ «Ազատ հայրենիք» (50 մարդ), «Ազգային վերածնունդ» (14 մարդ), «Արցախի ժողովրդավարական կուսակցություն (35 մարդ), Լեռնային Ղարաբաղի կոմունիստական կուսակցություն (14 մարդ), «Խաղաղություն եւ զարգացում» (6 մարդ), ՀՅԴ (34 մարդ) եւ «Շարժում 88» (14 մարդ):

Մեծամասնական ընտրակարգով առաջադրվել է 50 թեկնածու, որոնցից 27-ը ինքնաառաջադրվածներ են։ Երեք թեկնածու առաջադրել է ՀՅԴ-ն, 4-ական թեկնածուներ՝ «Ազատ Հայրենիքը» եւ Արցախի ժողովրդավարական կուսակցությունը, 5 թեկնածու՝ «Ազգային վերածնունդը», 7 թեկնածու՝ «Շարժում 88»-ը։ Մեծամասնական ընտրակարգով առաջադրվածներից 34-ն անկուսակցական են։

Լուսանկարները՝ Արսեն Սարգսյանի/NEWS.am