ՄԱԿ-ի մամուլի ծառայությունը պաշտոնապես հայտարարել է, որ ՄԱԿ-ի գլխավոր քարտուղար բան Կի-Մունը այցելելու է Մոսկվա՝ մասնակցելու Հաղթանակի օրվան նվիրված հանդսավոր արարողություններին եւ հանդիպելու ՌԴ նախագահ Վլադիմիր Պուտինի հետ:
Մոսկվայի ճանապարհին նա կմասնակցի նաեւ Գդանսկում (Լեհաստան) Երկրորդ համաշխարհային պատերազմի ավարտին նվիրված միջոցառումներին, որտեղ կհանդիպի այդ երկրի նախագահ Բրոնիսլավ Կոմորովսկիի հետ: Բան Կի-Մունը կլինի նաեւ Կիեւում, որտեղ կհանդիպի Ուկրաինայի նախագահ Պյոտր Պորոշենկոյի հետ, հաղորդում է «ՌԻԱ Նովոստին»:
Ավելի վաղ ՄԱԿ-ի գլխավոր քարտուղարի ներկայացուցիչ Ստեֆան Դյուժարիկը հայտարարել էր, որ Բան Կի-Մունի Մոսկվա այցի նպատակը Երկրորդ համաշխարհային պատերազմի ավարտին նվիրված հիշատակի միջոցառումներին մասնակցելն է: «Խորհրդային Միությունը հսկայական թվով կյանքեր է կորցրել նացիստական Գերմանիայի դեմ պայքարում, ուստի գլխավոր քարտուղարը կմասնակցի այդ միջոցառումներին»,-ընդգծել էր նա: