Նախագահի մամուլի գրասենյակը նոր մանրամասներ է հրապարակել ՀՀ նախագահ Սերժ Սարգսյանի եւ ամերիկյան սենատորների հանդիպումից։
Սերժ Սարգսյանի խոսքով, նաեւ սենատորներ Միտչ Մըքոնելի եւ Հարրի Ռիդի ակտիվ ջանքերի շնորհիվ հայ-ամերիկյան հարաբերություններն այսօր գտնվում են ամենաբարձր մակարդակի վրա: Սերժ Սարգսյանը երախտագիտություն է հայտնել զրուցակիցներին՝ տարիներ շարունակ Հայաստանի եւ հայ ժողովրդի համար կենսական նշանակություն ունեցող հարցերում առանձնահատուկ վերաբերմունք եւ հոգածություն ցուցաբերելու համար:
Հանդիպմանը մասնակիցները համակարծիք են եղել, որ Հայաստանի Հանրապետության անկախության ճանաչումից ի վեր հայ-ամերիկյան հարաբերություններն ընդգրկել են համագործակցության լայն շրջանակ: Հայաստանը եւ ԱՄՆ ամուր գործընկերային հարաբերություններ ունեն թե՛ երկկողմ, թե՛ բազմակողմ հարթություններում:
Նախագահ Սերժ Սարգսյանը բարձր է գնահատել Հայաստանի տնտեսական զարգացմանը, տարբեր ոլորտներում բարեփոխումներին, ժողովրդավարության եւ քաղաքացիական հասարակության կայացմանը տարիներ շարունակ ցուցաբերվող ԱՄՆ աջակցությունը՝ միտված ՀՀ պետականության ամրապնդմանը:
Նախագահը բարձր է գնահատել նաեւ ԱՄՆ դերակատարումը տարածաշրջանային անվտանգության եւ կայունության պահպանման գործում, այդ թվում ԱՄՆ-ի` որպես ԵԱՀԿ Մինսկի խմբի համանախագահ երկրի, ակտիվ ներգրավվածությունը ԼՂ հիմնախնդրի խաղաղ կարգավորման գործընթացում:
Հանդիպմանն անդրադարձ է եղել Հայոց ցեղասպանության 100-րդ տարելիցին, դրա շրջանակներում Հայաստանում եւ աշխարհի բազմաթիվ երկրներում անցկացվող հիշատակի եւ ոգեկոչման միջոցառումներին, այդ թվում՝ ՀՀ Նախագահի այցի շրջանակներում Վաշինգտոնի ազգային տաճարում կայանալիք Հայոց ցեղասպանությանը նվիրված միջկրոնական աղոթքին:
ՀՀ Նախագահը եւ ԱՄՆ սենատորները մտքեր են փոխանակել Հարավային Կովկասի տարածաշրջանի խնդիրների եւ մարտահրավերների, ԼՂ հիմնախնդրի կարգավորման բանակցային գործընթացի շուրջ: Ներկա բոլոր սենատորներն իրենց խոսքում կարեւորել են Հայոց ցեղասպանության ճանաչումն ու դատապարտումը:
Զրուցակիցները քննարկել են նաեւ Հայաստանի շրջափակման պայմաններում երկրին անհրաժեշտ տրանսպորտային եւ էներգետիկ այլընտրանքային հնարավորությունների ստեղծմանը վերաբերող հարցեր:
Ինչպես ավելի վաղ հայտնել էր NEWS.am-ը, Վաշինգտոնում ՀՀ նախագահ Սերժ Սարգսյանը Սենատում հանդիպել էր Արիզոնայից ընտրված սենատոր Ջոն Մաքքեյնին, Ռոդ Այլենդից սենատոր Ջեք Ռիդին եւ Նյու Ջերսիից սենատոր Ռոբերտ Մենենդեզին, Սենատի հանրապետական մեծամասնության ղեկավար Միթչ ՄքՔոնելին:
Սենատից հետո կայացել է հանդիպումը ԵԱՀԿ ՄԽ ամերիկյան համանախագահ, դեսպան Ջեյմս Ուորլիքի հետ:
