Այս տարի «Թանգարանային գիշեր» ծրագիրը նվիրված է Ցեղասպանության 100-րդ տարելիցին եւ կրում է «Թանգարաններ. հիշողության վկաներ» խորագիրը: Այս մասին այսօր՝ մայիսի 16-ին, լրագրողներին ասաց ՀՀ Մշակույթի փոխնախարար Արեւ Սամուելյանը:
«Այս տարի Հայաստանից եւ ԼՂՀ-ից 111 թանգարան է միացել ծրագրին, որը նախորդ տարվա համեմատ 10-ով ավելի է: Այս ակցիան իրականացվում է նաեւ Հայաստանից դուրս ՝ դեսպանատներում։ Ծրագրին միացել են նաեւ մասնավոր կազմակերպություններ»,-ասաց նա:
Մշակույթի փոխնախարարը նշեց, որ «Թանգարանային գիշեր» ծրագիրը մեկնարկելու է այսօր՝ մայիսի 16-ին՝ ժամը 18:00-ից, եւ տեւելու է մինչեւ 24:00-ն։ Այդ ընթացքում մուտքը ծրագրին մասնակցող թանգարաններ անվճար է։ Երեւանի մետրոպոլիտենն աշխատելու է մինչեւ 01:00-ն՝ այցելուներին տեղափոխելու համար։
Արեւ Սամուելյանը նշեց, որ այս տարի ծրագրի շրջանակում մեկ նորույթ ունեն՝ Firechat հատուկ հավելվածը, որը կարող են ներբեռնել iOS եւ Android համակարգեր ունեցող հեռախոսները եւ առանց ինտերնետ կապի օգտվել դրանից:
«3 օր է, ինչ հավելվածը գործում է, այն մեզ Ռուսաստանի մշակույթի նախարարությունն է փոխանցել, այն հնարավորություն է տալիս թանգարանների այցելուներին կիսվել օրվա իրադարձություններով եւ միաժամանակ տեղեկանալ, թե ինչ է կատարվում մնացած թանգարաններում»,-հավելեց նա:
Նշենք, որ թանգարանային միջոցառումները կշարունակվեն նաեւ մայիսի 18-ին:
Թանգարանների միջազգային օրը նշվում է 1977 թվականից: «Թանգարանային գիշեր» ծրագիրը մեկնարկել է 2005թ.՝ Ֆրանսիայի մշակույթի եւ հաղորդակցության նախարարության նախաձեռնությամբ՝ ՅՈՒՆԵՍԿՕ-ի եւ Եվրախորհրդի հովանավորությամբ: