NEWS.am-ը զգալի կրճատումներով ընթերցողի ուշադրությանն է ներկայացնում France Press-ի լրագրողներ Միշել Վիատտոյի եւ Մայք Կոլյերի՝ «Business Insider»-ում հրապարակված հոդվածը:
Եվրամիության եւ նախկին խորհրդային վեց պետությունների ղեկավարները հինգշաբթի գագաթաժողով կանցկացնեն՝ ուղղված «Արեւելյան գործընկերության» նախագծին, որը մշակվել էր փոխադարձ կապ պահպանելու համար, սակայն Ուկրաինայում Ռուսաստանի միջամտության արդյունքում այն խաթարվեց:
Լատվիայի մայրաքաղաք Ռիգայում երկօրյա հանդիպման թիվ մեկ հարցը լինելու է այն, թե ինչպես է 28 երկրներից բաղկացած ԵՄ-ն Հայաստանը, Ադրբեջանը, Բելառուսը, Վրաստանը, Մոլդովան եւ Ուկրաինան ներառող իր ծրագիրը համաձայնեցնելու Ռուսաստանի հետ իր հարաբերությունների հետ:
Ամեն դեպքում, նախանշաններ կան, որ Ուկրաինայում փոթորիկը հանդարտեցնելու ցանկություն կա Բեռլինի, Փարիզի եւ նույնիսկ Մոսկվայի մոտ, որը նվազեցրել է Ուկրաինա-ԵՄ պատմական առեւտրային գործարքին դիմակայությունը, որն ուժի մեջ է մտնելու հաջորդ տարվանից:
Եվրահանձնաժողովի նախագահ Ժան-Կլոդ Յունկերի խոսքով, ներկայում «Արեւելյան գործընկերության» վեց երկրների համար ԵՄ-ին անդամակցության հեռանկար գոյություն չունի, եւ այդպես կլինի առաջիկա հինգ տարիներին: Նրա թիմի դիվանագիտական ղեկավար Ֆեդերիկա Մոգերինին, առաջին հերթին, ձգտում է բարելավել Ռուսաստանի հետ հարաբերությունները: Այնպես որ՝ համատեղ ջանքերն ուղղվելու են ԵՄ-ի շահերն ու նպատակները հավասարակշռելուն՝ միաժամանակ հարգանք ցուցաբերելով Մոսկվայի շահերի եւ նպատակների հանդեպ:
Նույնիսկ գագաթաժողովի կազմակերպիչները՝ ԵՄ-ն եւ Լատվիան, որը ներկայում ԵՄ-ի 6-ամսյա նախագահողն է, խոստովանում են, որ որեւէ կարեւոր որոշում չի կանխատեսվում: Այն երկրներին, որոնք արդեն ստորագրել են ԵՄ-ի հետ Ասոցացման համաձայնագիրը՝ Վրաստան, Մոլդովա եւ Ուկրաինա, կխրախուսեն շարունակել բարեփոխել իրենց օրենքներն ու կանոնները՝ բլոկի հետ ավելի սերտ համագործակցության հասնելու համար:
Մինչ այդ, Հայաստանը մեջքով դարձավ դեպի ԵՄ-ի հետ Ասոցացման համաձայնագիրը, երբ միացան Պուտինի Եվրասիական տնտեսական միությանը: Ամեն դեպքում, Հայաստանը կարող է Ռիգայում հայտարարել, որ վերադառնում է Եվրամիության հետ բանակցությունների սեղանի շուրջ:
