Ես անհանգստացած եմ այդ հարցով եւ երկուշաբթի գրավոր դիմում եմ գրել Հանրային ծառայությունները կարգավորող հանձնաժողովի նախագահ Ռոբերտ Նազարյանին։ Այս մասին մայիսի 27-ին լրագրողների հետ զրույցում հայտարարեց Հայաստանի օմբուդսմեն Կարեն Անդրեասյանը՝ պատասխանելով էլեկտրաէներգիայի սակագնի բարձրացման մասին հարցին։
Անդրեասյանի խոսքով՝ իր դիմումի մեջ ինքը մի շարք կետեր է նշել, որոնցից մեկը վերաբերում է այդ հարցով հանրային քննարկումներին։ «Ես հարցրել եմ Նազարյանին, թե ինչ ձեւաչափով է անցնելու այդ քննարկումը, եւ ով է լինելու նախաձեռնողը։ Այն բանից հետո, երբ ես գործընթացների մասին տեղեկություն կունենամ եւ վստահ կլինեմ, որ ամեն բան ընթանում է հավուր պատշաճի, ես կանդրադառնամ նաեւ հարցի բովանդակային մասին»,- ասաց Անդրեասյանը։
Հարցին, թե նա չի կարծում արդյոք, որ սակագնի բարձրացումը մարդու իրավունքների խախտում է, Անդրեասյանը նշեց, որ քանի դեռ տրամաբանական հիմնավորումներ չեն ներկայացվել, եւ պետական մարմինները հարցի քննարկում չեն անցկացրել, այդ մասին խոսելը դժվար է։ «Եթե ապացուցվի, որ էլեկտրաէներգիայի սակագնի բարձրացումը հիմնավորված չէ, եւ դա հետեւանք է այն բանի, որ գինը արհեստական կերպով են բարձրացնում, ապա իհարկե խոսքը կվերաբերի մարդու իրավունքների ոտնահարումներին»,- եզրափակեց Կարեն Անդրեասյանը։