Հայաստանի իշխանությունները պետք է ոստիկանության կողմից անհամաչափ ուժի կիրառման մասին հայտարարությունների օբյեկտիվ եւ անկախ հետաքննություն ապահովեն: Այս մասին ասված է Amnesty International-ի հրապարակման մեջ: Ընդհանուր առմամբ, Երեւանի ոստիկանությունը 237 ցուցարար է բերման ենթարկել: Եվս 12 մարդ բերման է ենթարկվել Գյումրիում:
«Խաղաղ ցույցը ցրելու տակտիկայից պետք է խուսափել՝ խոսքի ազատության եւ հավաքների իրավունքը պաշտպանելու համար: Տեսագրությունը, որտեղ երեւում է, թե ինչպես են ջրցան մեքենաներից արձակվող շիթերն ակտիվիստներին գետնին նետում, անհանգստություն են առաջացնում»,- հայտարարել է Amnesty International-ի՝ Եվրոպայի եւ Կենտրոնական Ասիայի գծով տնօրենի տեղակալ Դենիս Կրիվոշեեւը:
«Եթե անգամ նախապես զգուշացումներ են արվել, ջրցան մեքենաները կարող են վնասվածք հասցնել: Դրանք երբեք չի կարելի կիրառել խաղաղ ցուցարարների դեմ: Բացի այդ, դրանք անկարգ են գործում եւ կարող են վնաս հասցնել պատահական անցորդներին: Որքանով մեզ հայտնի է, Հայաստանի իշխանությունները խուլիգանության գործ են հետաքննում, այլ ոչ թե ոստիկանության գործողությունները: Անհամաչափ ուժի կիրառման համար պատասխանատու իրավապահ ուժերը պետք է պատիժ կրեն»,- ասված է հրապարակման մեջ:
Կատարվածի ականատեսներից մեկն Amnesty International-ին տեղեկացրել է, որ քաղաքացիական հագուստով ոստիկանները հարվածներ են հասցրել խաղաղ ցուցարարներին:
Հունիսի 23-ի առավոտյան 5:30-ի սահմաններում ոստիկանությունը ջրցան մեքենաներ է կիրառել ճանապարհային երթեւեկությունն արգելափակած, սակայն ագրեսիա չցուցաբերող մարդկանց դեմ: Ի պատասխան, ցուցարարները սկսել են ոստիկանության ուղղությամբ ջրերով լի շշեր նետել: Մինչեւ ջրցան մեքենաների կիրառումն ագրեսիայի որեւէ դրսեւորում չի եղել:
Ոստիկանությունն իր հայտարարությունում մատնանշել է, որ իրավապահների ուղղությամբ քարեր են նետել: Ոչ լուրջ վնասվածքներ են ստացել 7 ցուցարար եւ 18 ոստիկան:
Ոստիկանությունը նաեւ հաստատում է, որ ցուցարարներից բացի՝ ագրեսիայի օբյեկտ են դարձել նաեւ լրագրողները: Չնայած նրանք փաստաթուղթ են ներկայացրել, իրավապահները, ամեն դեպքում, առգրավել եւ վնասել են նրանց տեսագրող տեխնիկան:
«Հայտարարություններն այն մասին, որ ոստիկանությունը նպատակաուղղված հետապնդել է լրագրողներին, ահազանգ են խոսքի ազատության շուրջ եւ հետաքննության կարիք ունեն»,- հայտարարել է Կրիվոշեեւը:
