Արեւմտյան լրատվամիջոցները շարունակում են լուսաբանել Երեւանում էլեկտրաէներգիայի թանկացման դեմ բողոքի ակցիաները:
Ինչպես գրում է բրիտանական BBC-ն, նվազագույնը 6 հազար ցուցարարներ դեպի նախագահական նստավայր երթ կազմակերպելու երկրորդ փորձն են ձեռնարկել:
«New York Times»-ը հիշեցնում է, որ հազարավոր ցուցարարներ երկրորդ օրն անընդմեջ մայրաքաղաքում դուրս են եկել ոստիկանների դեմ, ջրցան մեքենաներով ցուցարարներին ցրելուց եւ 200-ից ավելի մարդկանց ձերբակալելուց ընդամենը մի քանի ժամ անց:
«Washington Post»-ը գրում է. «Մի քանի օր Երեւանում տեղի ունեցող ցույցերն ամենազանգվածային են 2013-ին նախագահ Սերժ Սարգսյանի վերընտրության ժամանակ ընդդիմության կազմակերպած հանրահավաքներից հետո»: Պարբերականի փոխանցմամբ, հոսանքի թանկացման դեմ բողոքող ցուցարարներն ավելի քիչ ստրուկտուրիզացված են, քան նախընտրական բողոքների ժամանակ, սակայն նրանք կարող են լայն արձագանք ունենալ ներկա քաղաքական մթնոլորտում:
AFP-ի թղթակիցը նշում է, որ ծածանելով ազգային դրոշներ եւ գոչելով «ամոթ», «Ոչ թալանին», բարկացած ցուցարարները դեպի նախագահի նստավայր երթից առաջ լցրել են Ազատության հրապարակը:
«Wall Street Journal» թերթն իր հոդվածում ընդծել է, որ «ցուցարարները տնտեսական դժվարությունների առաջին հարվածների ալիքի ֆոնին հավաքվել են Հայաստանի նախագահի նստավայրի մոտ, իսկ դժվարությունների պատճառը տարածաշրջանում գերծանրքաշային Ռուսաստանի տնտեսության լճացմամբ է պայմանավորված»:
