Քիչ առաջ, ժամը 08.00-ի սահմաններում կրկին Բաղրամյան պողոտա այցելեց ՀՀ ոստիկանապետը Վլադիմիր Գասպարյանը:
«Եկել եմ տեսնելու, թե ինչ է կատարվում, որ հանկարծ արտառոց բաներ չլինեն: Տեսնո՞ւմ եք ինչ լավ է, որ այնուամենայնիվ որոշակի կազմակերպվածություն կա, որ աղբամաններն են մաքրվում: Ամեն ինչ նորմալ է: Եղեք խաղաղության մեջ, ինքներդ խոսակցություններով, լարելով մի սադրեք, եղեք խաղաղության մեջ եւ ամեն ինչ նորմալ կլինի»,-ասաց նա ցուցարարներին:
«Եթե այս հարցում միակամ լինեք, մյուս հարցերը իր ընթացքով կգնա: Եթե ինքներդ տեր չկանգնեք, ձեր միջից չմաքրեք ամեն տեսակ սխալ բան, հաստատ իմացեք ոստիկանության մեջ դա չկա ու չի լինելու»,-ընդգծեց նա:
Դիտարկմանը, որ ոստիկանները բռնություն են կիրառել լրագրողների նկատմամբ, կոտրել տեսախցիկները, ինչը տեսագրված է, Վլադիմիր Գասպարյանն արձագանքեց, որ այդ հարցով նշանակված է ծառայողական քննություն: «Իսկ ո՞վ ասաց, որ չեն կարող լինել թերություններ: Աստված ձեզ օգնական»:
Այնուհետեւ ՀՀ ոստիկանապետն իր ենթակաների հետ մի փոքր հեռացավ եւ սկսեց ինչ-որ հարց քննարկել:
Նշենք, որ Ազատության հրապարակում «Ոչ թալանին» նախաձեռնության չորս օր տեւած նստացույցից հետո հունիսի 22-ին ավարտվել էր նախաձեռնության՝ իշխանություններին տված վերջնաժամկետը, եւ ցուցարարները մեծ բազմությամբ շարժվել էին դեպի Բաղրամյան պողոտա։ Ոստիկանները փակել էին պողոտան, ինչից հետո նստացույց էր սկսվել։ Հունիսի 23-ին վաղ առավոտյան ոստիկանները ջրցան մեքենայի օգնությամբ ցրել էին ցույցը, ապա բերման ենթարկել 237 ակտիվիստների եւ լրագրողների:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
